НОВИ САД – Новосадски студенти, професоре, просвитни роботнїки и числени гражданє, вчера, 24. януара на вецей розкрижйох блокирали транспорт у городзе на 11:52 годзин и дали 15-минутову почесц настрадалим у нєщесцу на Желєзнїцкей станїци у Новим Садзе, а вец рушели до протестного шейтаня.
Єдна ґрупа студентох рушела зоз кампусу универзитета по Булевару цара Лазара, а друга од Медицинского факултета по Улїци цара Душана. През драгу ше им орґанизовано приключовали гражданє, просвитни роботнїки и други. Обидва колони ше стретли на розкрижю Булевара цара Лазара и Улїци цара Душана на Лиману. Шейтанє предлужене по Булевару Европи и Футожскей улїци, дзе их дочекали заняти, школяре и їх родичи зоз новосадских стреднїх и основних школох. Пре вельку масовносц колона предлужела до центру Нового Сада.
Студентох потримали роботнїки зоз ИТ Сектору, подприємства, орґанизациї, установи култури, адвокати, лїкаре, дзепоєдни медиї и велї други.
