18. ФЕБРУАР – На нєшкайши дзень народзена Нада Сабол, спикерка, водителька и новинарка у Руских редакцийох РТВ.
1898 – Народзени Енцо Анселмо Ферари (Модена, Италия, 18. фебруар 1898 – Маранело, 14. авґуст 1988) италиянски вожач швидких автомобилох и снователь марки автомобилох Ферари.
1932 – Народзени чехословацко америцки филмски режисер, сценариста, глумац и професор Ян Томаш Форман, познатши як Милош Форман (Часлав, Бохемия, Ческа Република, 18. фебруар 1932 – Данбери, Конектикат, ЗАД, 13. април 2018). Його филм „Лєценє понад куковково гнїзда” достал пейц Оскари.
1954 – Народзена длугорочна спикерка, водителька и новинарка у Руских редакцийох Радия и Телевизиї Нови Сад Нада Сабол (Руски Керестур, 18. фебруар 1954 – Нови Сад, 10. юлий 2018). Нада Сабол народзена у Руским Керестуре дзе закончела Основну школу, ґимназию у Вербаше, а Висшу економско-комерциялну школу у Новим Садзе. Як пришла на студиї до Нового Саду, 1974. року, такой ше уключела до роботи Рускей редакциї Радио Нового Саду дзе робела по одход до пензиї 2011. року. Була предложена за престижну спикерску награду у СФРЮ „Ґордана Бонети”. Нада Сабол похована 13. юлия на новосадским Городским теметове.
2002 – На пол ноци медзи 17. и 18. фебруаром франак престал буц леґалне средство плаценя у Французкей. Так Французка, постала треца зоз 12 жемох евро-зони хтора утаргла свою валуту и прешла на евро.
Медзинародни дзень биолоґийней контроли. Тот дзень пошвецени промоциї отримовних польопривредних праксох хтори важни за защиту животного стредку. Опомина ше же би ше зменшало хасновац чкодлїви материї як цо то пестициди и штучни гної, хтори гоч ефикасни у знїчтожованю чкодлївцох, маю аґресивни пошлїдки на акосистему, водово ресурси, дзиви животинї, та и на здравє людзох.