РУСКИ КЕРЕСТУР – Внєдзелю, 26. септембра, у новей спортско-школскей гали у Руским Керестуре отримане перше службене змаганє, а одбавели го рукометаше Русину и екипи Войпут 2, у трецим колє Бачкей рукометней лиґи.
Керестурци страцели зоз 32:36, а за Русин найвецей ґоли посцигли Гербут 10 и Хома 6. Пред змаганьом, Славкови Гербутови з керестурского Русину делеґат змаганя уручел окремне припознанє – за найлєпшого ґолґетера у Бачкей рукометней лиґи у прешлей сезони, понеже посцигнул аж 148 ґоли.
Перше службене змаганє у гали провадзела и числена публика, указало воно и на одредзени нєдостатки зоз шветлом и семафором, цо барз швидко будзе одклонєне, понеже уж нєшка и ютре там ушлїдза нови змаганя.
Нєшка, 29. септембра, рукометаше Русину на 20 г. бавя змаганє за Куп у кулскей општини процив Сивцу, а на ютре, рукометашки Русину одмераю моци з екипу Дироню.
