30. МАЙ – На нєшкайши дзень народзени академик др Владимир Ковач и Владислав Надьмитьо.
1936 – Народзел ше академик др Владимир Ковач (Бачинци, 30. май 1936 – Нови Сад, 19. децембер 2023), доаєн винарства у Сербиї и познати науковец у Европи и швеце, дописни член Французкей польопривредней академиї. Др Владимир Ковач основну школу закончел у Бачинцох, ґимназию у Новим Садзе и дипломовал на Польопривредним факултету. Почал робиц на Институту за винїцарство и овоцарство, Одсек за винарство у Сримских Карловцох, як асистент. На Технолоґийним факултету у Новим Садзе маґистровал 1969. року и докторовал 1975. року, пошвидко постал висши наукови сотруднїк, а потим, 1982. року постал наукови совитнїк. До пензиї пошол у юлию 2001. року. Як стипендиста Французкей влади Ковач 1967. и 1968. року бул у Французкей у Институту за винарство у Нарбону, у Дижону и на Фамацеутским факултету у Монпелєу. Вельку часц виглєдовцкей роботи у обласци винарства др Ковач реализовал у лабораториї проф. Жана Лаволея (Jean Lavollay) на Националним конзерваториюму за уметносц и ремесла (Conservatorie National des Arts et Metiers) у Паризу. Участвовал у науковим виглєдованю грозна и вина и на Универзитету у Мадриду. Од 1976. року бул фахови представнїк Югославиї у Медзинародней орґанизациї за винову лозу и вино (Office International de la Vigne et du Vin – OIV), а два мандати бул предсидатель Ґрупи експертох за „Медзинародни правилнїк о енолоґийних поступкох” (Code International des Pratiques Oenologiques), хтора основана при Зєдинєних нацийох. Од 1981. року бул член Медзинародней орґанизациї за виучованє полифенолних злученїнох (Groupe polyphenols), зоз шедзиском у Нарбону (Французка), и єден час член Административного совиту тей орґанизациї. Академик др Владимир Ковач траґично настрадал 19. децембра 2023. року у Новим Садзе, на Дунаю, на Шодрошу, дзе як каякаш рекреативец и член каякашского клуба бул на порядним рекреативним тренинґу, поховани є 23. децембра у фамелийней крипти на теметове у Сримскей Каменїци.
1947 – Народзел ше новинар и музичар Владислав Надьмитьо (Руски Керестур, 30. май 1947 – Киченер, Канада, 17. авґуст 2023). Осносвну школу закончел у родним валалє, а ґимназию у Суботици. Робиц почал у Прекладательней служби Скупштини АП Войводини, а после преходзи до НВУ Руске слово и як новинар робел до 1994. рок, кед ше зоз фамелию одселєл до Канади. Попри новинарства, його животна преокупация була музика. Любел грац на тамбури и ґитари, а грал у ґрупи Шкорванчки, у оркестру КУД Младосц у Суботици, у Новим Садзе у рижних популарних ґрупох, бул и у ґрупи Лира зоз Сашом Поповичом, котра постанє Слатки ґрех, и означи єден период на тих просторох. У дуету зоз Михайлом Микитом, означел перши Червени ружи же би бул и орґанизатор, а вец и композитор. Надьмитьо бул єден зоз порушовачох Ружовей заградки. И кед пошол до Канади, покля го служело здравє и инспирация, активно участвовал на тих наших фестивалох. Владислав Надьмитьо умар 17. авґуста 2023. року у Киченеру, Канада, дзе є и поховани.