11. ОКТОБЕР – На нєшкайши дзень у Бачинцох ше народзел Драґен Колєсар.
1922 – Першираз жена достала званє специялного аґента у Еф Би Ай.
1929 – Народзел ше ґлумец и режисер Драґутин Драґен Колєсар (Бачинци, 11. октобер 1929 – Петроварадин, 20. януар 1995). У Бачинцох закончел штири класи основней школи а 1940. року уписал ше до класичней ґимназиї у Заґребе, алє пре Другу шветову войну нє матуровал. Школованє предлужел 1949/1950. року у Новим Садзе у Державней театралней школи, хтору закончел 1953. року и пошвидко достал анґажман у Сербским народним театре. През 26 роки професийней кариєри у СНТ у Новим Садзе Драґен Колєсар одбавел коло 130 улоги, ґлумел и у телевизийних серийох и на филму. За архиву Радио Нового Саду режирал вецей радио драми на руским язику. Од 1975. року до пензионованя 1982. року бул режисер у Редакциї Програми на руским язику Телевизиї Нови Сад, источасно режирал и гумористично-музични емисиї як и документарни филми. Активно участвовал у роботи новосадского КПД Максим Горки, а у АРТ Дядя на сцену поставел 11 театрални представи. Наступал и як шпивач у Радио Нови Сад. Културно-уметнїцке држтво у Бачинцох ноши мено Драґутин Драґен Колєсар. Умар у Петроварадину 20. януара 1995. року, поховани є на петроварадинским теметове на Транджаменту.
1939 – Ґрупа америцких науковцох, медзи хторима и Алберт Айнштайн, информовали предсидателя ЗАД Френклина Рузвелта о можлївосци продукциї атомскей бомби.
Медзинародни дзень борби процив природних нєпогодох (International Day for Disaster Risk Reduction) преглашени 1989. року на инициятиву Ґенералней скупштини Зєдинєних нацийох.
Шветови дзень дзивчатох (International Day of the Girl Child). Праве 11. октобра 2016. року, амбасадорка добрей дзеки Зєдинєних нацийох поволала фамелиї ширцом швета же би зопарли дзецински малженства.