СРИМ – У парохийох Сримского деканату у шидскей општини на Крачун було окреме торжествено.
На Всаночним на Вилїю, хторе на 22 г. у Шидзе служел парох о. Михайло Режак, було надосц вирних, окреме дзеци и младих, а по шпиваню ходзели млади з КПД „Дюра Киш”. Парох Режак шицкима повинчовал щешлїви и благословени Крачун, а после Всаночного, по традициї, шпиванє колядох и друженє предлужене у Руским доме.
На Перши дзень Крачуна на Служби пречитана и крачунска винчованка апостолского еґзарха за грекокатолїкох у Сербиї кир Георгия Джуджара, а нєшка по Служби будзе мированє.
Як Рутенпрес дознава од о. Владимира Еделинския Миколки, пароха у Беркасове, на Вилїю у тим месце Всаночне служене на 19 г., а у Бикичу на 21 г. и церква у Бикичу була полна з вирнима. У Бикичу штири ґрупи дзецох ходзели по шпиваню, хлапци ношели и вертеп, а по Всаночним, Бикичанє ше дружели у крачунским амбиєнту у сали Дому култури. На Перши дзень Крачуна на Богослуженьох у спомнутих двох местох було мированє.
На Вилїю парох у Бачинцох о. Дарко Рац служел Службу Божу Василия Велького, вечар даскельо дзеци ходзели по шпиваню, а у Саночним на 22 г. було красне число Бачинчанох. И у Бачинцох колядованє предлужене после Всаночного у парохийней сали, дзе ше вирни позберали и дружели. На Служби Божей на Перши дзень Крачуна пречитана и Крачунска винчованка нашого владики кир Георгия Джуджара по руски и по українски, а по Служби було мированє.
