РУСКИ КЕРЕСТУР – Пре числени виволаня коло тогорочного орґанизованя 65. Фестивалу рускей култури Червена ружа, а хтори будзе отримани на пияток и соботу, 26. и 27. юния, Орґанизацийни одбор порушал кампаню збераня средствох за софинансованє того фестивалу. Средства ше од пондзелку, 15. юния, збера прейґ такволаней Crowdfunding платформи Добри дабар прейґ хторей поєдинци або орґанизациї можу уплациц донациї.
Як визначене на спомнутей платформи Добри дабар, Фестивал Червена ружа ше традицийно софинансує зоз општинского, покраїнского и републичного буджету и зоз средствох Националного совиту Руснацох, медзитим, тоти средства вецей нє достаточни понеже трошки орґанизациї и продукциї рошню, а одобрени средства роками оставаю исти.
На спомнутей платформи представена програма Фестивалу, його важносц за руску заєднїцу, и наведзени вецей причини прецо нєобходна финансийна помоц, а даєдна од визначених причинох дзе финансиї маю уплїв на форму фестивалу, то же Ружа ма потенциял тирвац три днї, гоч уж вецей роки тирва лєм два, тиж зменшани и наступи госцуюцих ансамблох з иножемства, а ґу тому и руски музични скарб остава нє зазначени у аудио формату як дакеди.
Фестивал, як далєй наведзене у тексту, стої, насампредз, на ентузиязму наших аматерох хтори нєдостаточни же би покрил реални трошки орґанизациї.
Потераз назберане коло 40.000 динари, мож уплациц найменєй 1.000 динари, а циль прейґ платформи назберац 250.000 динари хтори би були потрошени на отримованє фестивалу. Кед ше случи же донациї будзе вецей як поглєдоване, средства ше уложи до дальшого розвою фестивалу, окреме до ришованя надпомнутих виволаньох (знїманє шпиванкох, врацанє трецого дня фестивалу итд).
Уплациц можу и физични лїца и подприємства, и зоз жеми и зоз иножемства, а уплата може буц и анонимна.
Платформа за уплати ше находзи на тим линку.