16. ЮНИЙ – На нєшкайши дзень народзела ше Марґита Лучечко, дзивоцке Лїкар.
1852 – У Новим Садзе друковане перше число новинох Сербски дневник, з литературним додатком Седмица. Новини виходзели 12 роки и були єдни з ридких славянских новинох у австрийскей монархиї.
1859 – Народзел ше сербски маляр Пая Йованович (Вершец, 16. юний 1859 – Беч, 30. новембер 1957).
1890 – Народзел ше анґлийски филмски ґлумец Стен Лорел (Улверстон, Зєдинєне Кральовство, 16. юний 1890 – Санта Моника, ЗАД, 23. фебруар 1965), гвизда комедийох у хторих, як худи, творел тандем зоз Оливером Гардийом як тлустим.
1909 – Народзела ше директорка, наставнїца, дружтвена активистка Марґита Лучечко, дзивоцке Лїкар (Руски Керестур, 16. юний 1909 – Руски Керестур, 24. юлий 1988). Основну школу Марґита Лїкар закончела у Дюрдьове, а Стредню фахову школу за схопносци и ручни роботи у Заґребе. Робела як директорка Ремеселнїцкей школи у Сримскей Митровици, а потим у ОШ Петро Кузмяк у Руским Керестуре дзе була вихователька и наставнїца подобового и музичного воспитаня. Була и дириґентка школского хору и дзивоцкого оркестра мелодикох. Орґанизовала и тримала валалским женом курси за сучасне варенє и водзенє обисца, скраванє, шице, вишиванє и други ручни роботи. Марґита Лїкар написала приручнїк за ґаздинї Наша кухарка, хторе 1953. року видало Видавательно-друкарске предприяце Руске слово Руски Керестур, а дополнєне виданє 2007. року обявело Дружтво за руски язик, литературу и културу з Нового Саду. Марґита Лучечко умарла 24. юлия 1988. року, похована є у Руским Керестуре.
1920 – У Лондону отримана перша схадзка Дружтва народох.
1948 – Драмска секция Месного одбору Рускей матки у Кули пред свою публику премиєрно виведла театрални фалат Г. К. Основяненка Сватання на Гончарівці у режиї Петра Ризнича Дядї.
1960 – Отримана премиєра Хичкокового филма Психо.