ҐОСПОДЇНЦИ – З Архиєрейску Службу Божу, хтору предводзел владика кир Георгий Джуджар, Ґосподїнчанє всоботу, 21. новембра преславели Собор Архангела Михаила – свой Кирбай. Сослужели священїки з нашого Еґзархату – о. Борис Холошняй з Бечу и протоєрей Милан Стипич з Ястебарского, зоз Жумберку (Крижевске владичество), котри и наказовал.
На Служби домашнї парох о. Михаил Холошняй покресцел малого Георгия Барата, у присустве оца Дарка, мацери Бояни и кумових Марка Аноичича и Єлени Павлович. Владика Георгий потим миропомазал новокресценого Георгия.
Наш еґзарх на Кирбаю окреме привитал Ґаврила Ґрбана з Беоґраду, з Управи за сотруднїцтво з Церквами и вирскима заєднїцами Министерства правди и подзековал на помоци у видаваню „Моноґрафиї грекокатолїческого общества при Храме св. архангела Михаила – Ґосподїнци”, автора о. Михаила Холошняя Матїйового. З тей нагоди Ґрбан достал прикладнїк „Моноґрафиї”, а ґосподїнскей парохиї подаровал икону креста Господнього.
Тиж так, Новосадяне Звонко и Саня Ґоґово достали припознанє за помоц з вельким прилогом у видаваню „Моноґрафиї”, а як заслужним парохияном, владика додзелєл грамоти Василийови Иванови, Меланиї Горняк, Олґи Салонски и Ани Малїк.