РУСКИ КЕРЕСТУР – У дворе Основней и штреднєй школи „Петро Кузмяк”, штварток 18. юния, отримана роботна акция хтору орґанизовал Совит родичох зоз помоцу Школярского парламенту и Здруженя младих „Пакт Рутенорум”.
Положени нови кошаркашски табли, офарбени конструкциї за коши, офарбени ґоли, виписани линиї на фодбалским и кошаркашским терену, пооправяни и офарбени лавочки, офарбена бина, канти за одрутки и пошорени двор. То була перша фаза роботох, а друга фаза запланована на єшень и теди ше буду садзиц древка и квеце, а можебуц ше пременї и чоп за воду.
Школярски парламент за тоту акцию видвоєл 50.000 динари, а то пенєж хтори назберани на Новорочним вашаре пред двома роками. Пактовци, попри тим же пришли помогнуц, тиж так пожичели и свойо щеточки, рольки и рукавици, маляр Славко Пап напредок дал потребну фарбу и наплацене будзе лєм тельо кельо ше потроши, а кед тота сума будзе векша як 50.000 динари, рижни донаторе з валалу ше понукли помогнуц у тей часци. Тиж ше чека и донацию мрежох за ґоли на фодбалским терену од єдного члена Совиту родичох.
За ошвиженє и окрипенє средства нє було, алє ше за тото остарали волонтере и родичи хтори з дзецми пришли помогнуц украшиц школски двор, та нїхто нє остал анї гладни анї смиядни.
