Як и каждого року, НВУ „Руске слово” означело свой дзень кед 15. юния 1945. вишло перше число новинох, зоз додзельованьом наградох и друженьом з пензионерами. То порученє же думаме на шицких котри з длугорочну роботу дали доприношенє нашей установи.
Того року додзелєни два порядни награди. На предкладанє главней редакторки редакциї Часописа за дзеци „Заградка” Маї Зазуляк Гарди, алє и Ясмини Дюранїн котра тиж була у тей улоги, дворочна награда „Заградки”, котра ноши мено писателя Михайла Ковача, була додзелєна Леи и Анамариї Ранкович за найлєпши авторски тексти, активносц и иновативносц у часопису, за период од 2024. по 2026. рок.
Леа и Анамария Ранкович зоз НВУ „Руске слово” сотрудзую од 2023. року, кед им у часопису „Заградка” почала виходзиц рубрика Радио у Заградки. Слово о сотруднїцтве медзи „Заградку” и „Емисию за дзеци” Радия Нового Саду, чия авторка праве Анамария Ранкович.
Награда Часописа за дзеци „Заградка” – „Михайло Ковач”, заснована 2020. року на 75-рочнїцу установи, а потераз ю достали тройо лауреати – Юлиян Пап (2020), Иґор Орсаґ як медзиредакцийну награду (2022) и Мария Ковачевич (2024).
На предкладанє главней редакторки Мултимедиялного часописа за младих МАК Александри Бучко, дворочна награда часописа МАК була додзелєна Анї Гудак Заґоричник за найлєпши дизайн и илустрациї, як и активносц и иновативносц у часопису МАК, за период од 2024. по 2026. рок.
Аня Гудак Заґоричник длугорочна ґрафична дизайнерка и илустраторка у часопису МАК. Зоз свою роботу, алє и талантом вона збогацовала випатрунок часописа од числа по число, од кеди почала свой анґажман 2022. року.
Награда Мултимедиялного часописа за младих МАК тиж заснована 2020. року на 75-рочнїцу установи, а потераз ю достали штверо лауреати – Златко Емейди (2020), Цецилия Надь (2022), Иґор Орсаґ як медзиредакцийну награду (2022) и Михайло Планкош (2024).
Награди состойна часц роботи у колективу. Заняти и сотруднїки котри ше трудза треба же би були похвалєни и наградзени. Добре достац на плацу даєден динар, алє фино мац и диплому – на полїчки, або урамену на муре. Хто як люби.
НВУ „Руске слово” ма кредибилни награди, у чиїм додзельованю роками витирвало, як цо то награда литературного додатку „Литературного слова” – „Мирослав Стрибер” и Часописа за науку, литературу, културу и уметносц „Шветлосц” – „Микола М. Кочиш”, алє и награди занятим и сотруднїком.
Же би награди у „Руским слове” мали ище яснєйши критериюм и виражели становиско о тим яки вредносци установа промовує, на 75-рочнїцу фирми усвоєни нови правилнїк, котри облапел деценийску позитивну праксу и детально ушорел систему наградзованя.
Наградзованє то психолоґия. Америцки актуални предсидатель по тим питаню помкнул червени линиї зоз потребу буц наградзени – по кажду цену.
Нажаль, нєшка у дружтвених сферох наградзованє постало еґоцентричне и компететивне, вше менєй єст явного интересу. Поєдинци сцу достац лєгко и цо вецей награди. Лєм постац найлєпши у явносци.
Добре то кед єст вецей центри котри наградзую пре свойо интерни потреби, алє з тим наградзованє девалвиране. Часто видзиме же доставаю особи, або институциї награди лєм пре даяки узки интерес.
У рускей заєднїци нєт вельо институциї котри конзистентно и ясно наградзую членох своїх колективох и сотруднїкох. Ище вше, найпошлїдовнєйши школи, алє вони часц велькей державней системи Републики Сербиї. Гевти други додзеля награди з часу на час, без ясних критериюмох и вец ше таки награди анї нє спомина.
Награда тиж питанє моралу, наградзовача и наградзеного. Нє знам же би у рускей заєднїци дахто врацал награди, або же би му одберали, алє єст и такого…
НВУ „Руске слово” ма славни два Ордени братства и єдинства зоз 1968. и 1970. року, єден од нїх стої у каждим чишлє новинох при импресуме. Могло би розправяц о нїх пре єднопартийну систему, котра нє познала стандарди сучсного новинарства, алє теди то бул найвекши успих информованя.
Як институция, НВУ „Руске слово” остатнї роки нє доставало награди, за розлику од других меншинских новинско-видавательних хижох у Войводини. И то добре, бо хто чита тоти медиї, зна пре котри интереси им додзелєни найвисши державни награди.
Алє нам окреме мило же вецей нашо новинаре, редакторе и авторе наградзени у ширшей заєднїци и то нам найвекша чесц. Окреме награди од Нєзависного дружтва новинарох Войводини, Поверенїци за защиту ровноправносц Републики Сербиї и ОЕБС-у, як и од канадскей Фондациї Штефана Чепи. Бо, установа то – нєзависни поєдинци.