Явна тайна же нашо дзеци у велїх валалох и варошох у хторих жию, медзи собу бешедую по сербски. Добра часц тих дзецох, гоч им обидвойо родичи Руснаци, дома, тиж так, бешедую по сербски. О тим як бешедую тоти цо им дахто од родичох сербскей националносци нє треба вельо штудирац. Подрозумює ше же ше дома и зоз дзецми, по правилу, хторе, правда, ма и винїмки, бешедує по сербски. Кед то так, а так є, кед и нє горше, вец ясне чом нєт дзеци хтори ше, окрем у Руским Керестуре, уписую до школи дзе ше учи по руски.
Як медиї по руски нєдавно поинформовали Руснацох, у нащиви керестурским малим ґлумцом и керестурскей основней школи були школяре зоз рижних местох у хторих жию Руснаци. Красни способ же би нашо дзеци хтори жию у мишаних штредкох видзели, голєм на єден дзень, як то випатра жиц у руским штредку, дзе скоро шицки и скоро вшадзи бешедую по руски. Медзитим, як ме после тей подїї случайно поинформовал мой наймладши унук, тота нащива, як випатра, векшини тим дзецом нє значела нїч за уплївованє на їх руску националну свидомосц. Вон бул розчаровани зоз фактом же велька векшина тих дзецох, под час нащиви до Руского Керестура, медзи собу и зоз керестурскима дзецми бешедовала по сербски!
Очиглядно же Руснаци у Войводини и Сербиї нє сцу же би їх потомство було руске, а нє мало єст и таких хтори у рокох чийо дзеци уж маю свойо дзеци, ище скорей нє научели свойо дзеци, нєшкайших родичох, же би бешедовали по руски и же би були Руснаци. Руснаци, випатра, воля буц гоч цо друге лєм нє Руснаци. То значи же руска национална свидомосц добрей часци нашого народу ровна нули, односно практично нє постої. То стан хтори тирва и хтори бул присутни и пред 50 роками кед моя ґенерация сновала свойо фамелиї и починала воспитовац своїх потомкох, алє теди лєм як ридки винїмки, док то тераз постава правило. О тим ше нїґда и нїґдзе нє бешедовало. Ґенерациї Руснацох свидоми тей ситуациї були о тим цихо и нїхто нїґда нє преберал нїч. Пред даскельома роками, кед шицким постало ясне же и Дюрдьов и Коцур страца руских школярох зоз перших класох основних школох, Одбор за образованє Националного совиту рускей националней меншини пробовал уплївовац на пременку такого стану. Медиї, руски институциї, руски интелектуалци, та и церква, место же би зоз шицку силу прилапели започати активносци, нє придружели ше ґу роботи же би ше стан пременєло.
Тераз, по шицким, уж нєскоро. Децениями нєми, потрошели зме шицок час велїх ґенерацийох нашого народа препущуюци ше националному препаданю. Нїхто ше децениями нє чувствовал поволани же би насампредз будуцих родичох, з дня на дзень, прешвечовал же буц Руснак нє значи буц гендикепирани, менєй вредни, лєбо нєдостойни и найвисших фахових и академских званийох и локалного, реґионалного, националного, та и медзинародного угляду и почитованя. Напроцив. Гевти цо дакус вецей читали знаю же наш руски язик прави славянски есперанто, зоз хторим ше можеме згвариц зоз шицкима славянскима народами и без векшей бриґи читац скоро шицко цо написане на тих язикох. Вон нїяке нє препреченє за школованє и на найвисших школох на сербским и других язикох, за роботу у гоч яким окруженю у Сербиї, лєбо у рижних жемох швета и гоч дзе, на найобичнєйших, як и на найспецифичнєйших роботох. Значи же обєктивни причини за постояци стан нє постоя. Причини постояцого стану у нас самих, у Руснацох.
Мнє ясне же то особни ствари и питаня власного вибору. Алє заш лєм, нє ясне ми же цо медзи Руснацами остало од наших прадїдох, тих руских кощакох цо нє дали же би им до їх валалских школох уводзели школованє на мадярским язику и по цену же би их заверали до гарешту, били, преганяли… и цо скоро 300 роки чували свою руску националну свидомосц, а тераз їх потомки, хтори вельо лагоднєйше жию и маю шицки права, олєгко добродзечно даваю свою „виру за вечеру”, односно одрекаю ше свойого прадїдовского язика и идентитету.
Як чловек у рокох, наслухал сом ше од церковних особох, учительох и новинарох о тим яку важну улогу у очуваню нашого идентитета мали церква, школи и у новших часох средства информованя. Кед ше нєшка патри цо у терашнїм, за наш национални идентитет критичним периоду, робя тоти институциї цо важно уплївує на пременку постояцого стану, чежко би ше могло повесц же робя гоч цо цо пременї стан на лєпше. Напроцив. Шицки вони, як и роками пред тим, запатрени до своєй еґзистенциї и важносци, нє пребераю нїч. Церква задовольна зоз полєпшаньом свойого материялного стану ше ровнодушно припатра на нєставанє Руснацох, школи у проблемох бо оставаю без дзецох цо приводзи до питаня будуцу роботу їх учительох, та можебуц окрем керестурскей, еґзистую на перифериї процесох хтори нєшка характеризую руски национални живот, а средства информованя препущени новинаром, пре иґнорованє еґзистенциялних проблемох народа, поставаю ирелевантни и окрем занятих, углавним койяких приучених новинарох, нє интересую нїкого озбильного, а окреме млади ґенерациї.
Становиска висловени у тим тексту виключно авторово и нє вше одражую ушорйовацку политику новинох „Руске слово”.