Гражданє маю право знац як ше приноша одлуки котри уплївую на їх каждодоньови живот, кед слово о роботи локалного парламенту, алє и о шицких явних институцийох, чия робота муши буц явна и транспарентна. Насампредз прето же ше приноши одлуки як ше розполага зоз явним добром, зоз явнима приходами, а то насампредз, основне начало демократского дружтва.
Роками, та аж и децениями, у чаше вецей зволаньох СО Кула, новинаре присуствовали на схадзкох, поряднє провадзели роботу локалного парламенту и информовали явносц о найважнєйших одлукох. Терашнє зволанє кулского парламенту, одкеди почало робиц, отримало уж три схадзки. На першей конститутивней шлєбодно присуствовали новинаре, медзитим, ситуация ше цалком пременєла уж на другей и трецей схадзки. Опрез будинку Општини була поставена ограда, коло нєй полиция и приватне обезпеченє, а новинаром забранєни уход. О роботи информовала лєм локална приватна телевизия „Ку медия” котра и обезпечела директне видео-емитованє. „Руске слово” писало и вимагало толкованє, алє одвит на вимогу за акредитованє, або прецо то так, зме нє достали. Най здогаднєме, потераз, роками до нашей редакциї сциговала урядова поволанка зоз дньовим шором за схадзки.
Таке одношенє ґу медийом отвера озбильне питанє почитованя законских началох явносци роботи орґанох локалней самоуправи, алє и ровноправного одношеня ґу шицким реґистрованим медийом.
Закон о локалней самоуправи предвидзує явносц роботи Скупштини, а Устав Републики Сербиї ґарантує шлєбоду информованя и право гражданох же би були обвисцени о шицким цо ма явне значенє. Кед же медийом заварти дзвери присуствовац на схадзкох, а без явного толкованя и транспарентней процедури, гражданє нє маю можлївосц зоз вецей жридлох достац подполну слику о роботи своїх вибраних представнїкох.