РУСКИ КЕРЕСТУР – З оглядом на тото же потерашня директорка Дома здравя Кула др Весна Томич вибрана за предсидательку Општини, на место окончователя длужносци директора вибрани др Блаґоє Маркович.
Кед слово о керестурскей амбуланти, хтора дїлує у рамикох Дома здравя Кула, у цеку замена облакох на цалим будинку амбуланти, подобни роботи ше источашнє окончую и у Червинки, а у Сивцу су нєдавно закончени.
Директор Маркович за Рутенпрес виявел же накадзи ступел на место директора обишол шицки амбуланти у нашей општини. Похвалєл ше же даґдзе роботи на замени столариї закончени, а на даєдних местох ше праве тераз роби, з тим же у Руским Керестуре, окрем нових ПВЦ облакох, нєдавно закончени и роботи на новей котловнїци, так же ше амбуланта будзе зогривац на ґаз а нє на мазут, як потераз.
Вон додал и же ше од 1. юлия до валалскей амбуланти враца и дохторка Златана Надь, так же, вєдно зоз дохторку Джуджарову, буду робиц два дохторки у двох зменох. Тиж так, од 1. юлия, раз або двараз до тижня будзе робиц и дзецинске оддзелєнє, на хторим будзе робиц дохторка Александра Варґа, хтора хвильково на специялизациї за педиятра.