НОВИ САД – Предсидатель Националного совиту рускей националней меншини (НСРНМ) Стеван Самочета и предсидателька Одбору за образованє Сенка Мученски були на схадзки у Предшколскей установи (ПУ) „Радосне дзецинство” з намиру же би ше порушало формованє мишаней ґрупи по возросту на руским язику у Новим Садзе.
Самочету и Мученскову у ПУ „Радосне дзецинство” прияли директорка Драґана Проле, єй заменїца Милица Катич, помоцнїца директорки Таня Савич, и координаторка социялней служби Ружица Сворцан, котри були розположени за реализованє такей идеї.
Представнїки НСРНМ иницировали схадзку, и як нам потолковали домашнї их крашнє прияли и указали вельку дзеку за отверанє рускей ґрупи мишаней по возросту. Начално догварене же єст можлївосци оформиц мишану ґрупу по возросту од три по 5 и пол роки, же НСРНМ такой на єшень будзе ознова контактовац заинтересованих родичох у Новим Садзе, та кед ше будзе знац приблїжне число дзецох, од роботного року 2027/28 у просторийох ПУ „Радосне дзецинство” би могла буц формована ґрупа на руским язику.
Дотхли ше и теми же хто би могла буц воспитачка, алє як потолковане, кед же придзе до реализованя тей идеї, ПУ ше остара о тим, бо медзи занятима єст и Рускинї.