РУСКИ КЕРЕСТУР – Од пондзелку 29. юния по 2. юлий, у Штреднєй школи Петро Кузмяк у Руским Керестуре, та и на уровню держави, тирвал упис розподзелєних школярох до штреднїх школох. Упис могло окончиц електронски, прейґ порталу Моя штредня школа, або нєпоштредно у школи.
До ґимназиї Петро Кузмяк, до оддзелєня з руским наставним язиком, уписани 7 школяре, 10 уписани до оддзелєня на сербским наставним язику, док 22 школяре до напряму туристично-готелиєрски технїчар.
Понеже у керестурскей штреднєй школи у каждим образовним профилу капацитет 28 школяре, остало ище 21 шлєбодне место у руским, 18 у сербским оддзелєню ґимназиї, а 6 на туристичним напряму. То значи же ше школяре годни уписац и у трецим уписним кругу хтори будзе 24. и 25. авґуста, нєпоштредно у школи.
З оглядом же школяре свою одлуку о вибраней школи, прейґ писаней молби, годни пременїц и после 1. септембра, число школярох у керестурскей штреднєй школи вироятно будзе и векше.
За оддзелєня у хторих настава на язикох националних меншинох, а кед єст уписаних менєй як 15 школяре, школи подноша молбу же би ше им допущело оформиц оддзелєнє, та така пракса будзе запровадзена и того року у нашей школи.
Упис до Домох школярох, односно до интернату у керестурскей Школи, почал 29. юния и будзе тирвац по 10. юлий.