СЕРБИЯ – На 53 виберацких местох внєдзелю, 1. новембра було отримане повторене гласанє за нове зволанє Народней скупштини, право гласа мали 24.438 особи, а призначена виходносц од 43,6 одсто.
Гласанє повторене на 31 виберацким месце дзе нє могло утвердзиц резултати после отриманих виберанкох 25. октобра, там нєстал контролни лїсток од виберацкого места по општински виберанково комисиї, и на 22 виберацких место дзе гласанє понїщене пре рижни нєправилносци.
Гласанє було повторене и у Шидзе на виберацким месце 35 у Ґимназиї „Сава Шуманович”, од вкупно 1108 уписаних гласачох, на тот завод сойо право гласа вихасновали 525, цо значи же виходносц була 47,4 одсто. Найвецей гласи, 301 освоєла Студентска лїстина, цо 58,1 одсто, а СНС 209 гласи, односно 40,3 одсто.
Ознова ше гласало на гласацким месце 14 у Кули, у Културним центру „Непкер”, зоз 849 уписаних, гласали 484 особи, цо виходносц од 57 одсто. И на тим гласацким месце прешвечлїво найвецей гласи достала Студентска лїстина, 48,2 одсто зоз 230 гласами, потим СНС 121 глас, 25,4 одсто, и СВМ 117 гласи 24,5 одсто.
После гласаня 1. новембра, потим як обробени резултати зоз обидвох терминох гласаня, зоз шицких 8392 виберацких местох Републична виберанкова комисия обявела же Студентска лїстина – Студенти победзую тераз ма 53,01 одсто, док лїстина „Александар Вучич – Зєдинєна Сербия” достала потримовку 38,98 одсто гласачох. После повтореного гласаня, проєкция Парламенту така же Студентска лїстина будзе мац 140 мандати, СНС 103, Союз войводянских Мадярох 2, Албанска коалиция 2, Расим Ляїч – Людски 1, СДА Санджаку 1, и нове же у єден мандат припаднул бошняцкей странки Усаме Зукорлич–Рух за зєдинєнє.
Подцагуюци смужку, на тих парламентарних виберанкох гласали 4 милиони 444 тисячи и 310 гражданє Републики Сербиї, цо 68,89 одсто уписаних у Єдинственим гласацким списку.
Понеже зоз тим закончени парламентарни виберанки, од обявйованя конєчних резултатох починаю чечиц и термини за конституованє нового зволаня Народней скупштини. РВК ма термин найвецей 10 днї же би додзелєла мандати народним посланїком, а першу схадзку Народней скупштини ма обовязку зволац терашня предсидателька Скупштини у технїчним мандату Ана Брнабич.