РУСКИ КЕРЕСТУР – На пияток, 6. новембра на 18 годзин прейґ зум платформи будзе отримана 51. схадзка Националного совиту Руснацох, хтору зволал предсидатель Совиту Стеван Самочета.
На Дньовим шоре буду вецей точки, активносци медзи двома схадзками, приношенє одлуки о позарядових стипендийох, приношенє одлуки о вименкох и дополнєньох Финансийного плану Националного совиту за 2026. рок, як и вибор нєзависней ревизиї финансийного дїлованя за чечуци рок.
Надалєй ше будзе гласац за даванє думаня о кандидатови за директора ОШ „Светозар Милетич” у Вербаше, як и о кандидатки за директора Штредньошколского дому у Новим Садзе.
Предвидзене и потвердзованє вецей одлукох котри у медзичаше принєсол Вивершни одбор – даванє думаня о розришеню члена Управного одбору Дома школярох штреднїх школох „Бранково коло” у Новим Садзе зоз шора родичох, даванє думаня о кандидатови за директора ОШ „Перша войводянска бриґада” у Новим Садзе, даванє думаня на Нарис Одлуки о утвердзованю назвох улїцом и другим часцом населєних местох на териториї општини Бачка Тополя, даванє думаня за додзельованє средствох з буджету Городу Сримска Митровица за 2026. рок Здруженю гражданох „Руске дружтво” Сримска Митровица за проєкт „Руски соловеї”, и даванє предкладаня за розподзельованє средствох за проєкти послани на Явни конкурс Города Нового Саду за софинансованє проєктох у култури у обласци сучасней творчосци у 2026. року.