РУСКИ КЕРЕСТУР – З нагоди Дня ошлєбодзеня валалу у Другей шветовей войни, Здруженє спортских рибарох „Коляк” традицийно орґанизує змаганє у лапаню чуки на дуґов, такволану „Чукияду”.
Внєдзелю, 1. новембра на рибарскей писти на часци беґелю од базену по мост, змагал ше 21 рибар, преважно зоз Руского Керестура, а були и даскельме рибаре зоз Крущичу. Треце место зоз влапенима 1.310 ґрамами чуки завжал Мирон Лазор, 1.420 ґрами, цо було достаточне за друге место, влапел Владимир Планчак, а найвецей, вкупно 1.830 ґрами чуки влапел Микола Рац, хтори освоєл перше место. Попри наградзених, подзекованя достали и наймладши рибаре, браца Стефан и Павле Михайлович.
Як визначел член ЗСР „Коляк” Деян Чернок, хтори на тот завод бул судия и домашнї, после слабого раншого старту кед же скоро анї нє було цвенканя, по конєц змаганя влапени вкупно 17 чуки, найменша мала лєм 185, а найвекша 1.100 ґрами. Як и потераз, и тото случованє прешло у добрей атмосфери, а и хвиля потримала гоч з часу на час рошел слаби диждж.
Кед слово о правилох змаганя, лапало ше на 3 циґонї на дуґов, без такволаней „балерини”, а зоз штвартим циґоньом могло лапац рибки. Котизация була 2.000 динари, а уключовала и полудзенок. Друженє и окрипенє после змаганя орґанизоване у лєтнїковцу на базену, зоз смачну капусту хтору за шицких учашнїкох и госцох уварели Владимир Горняк и Ярослав Гарди.
