ДЮРДЬОВ – У просторийох Културно-уметнїцкого дружтва „Тарас Шевченко” у Дюрдьове, вчера, пондзелок, 2. новембра представена лїстина число 3 котра ноши мено „На габох пременки” за предстояци виберанки за членох Националного совиту рускей националней меншини.
На промоциї бешедовали присутни члени з лїстини, а медзи нїма єй ношитель доцент др Александар Мудри зоз Кули/Руского Керестура, професорка руского язика Ана-Мария Рац зоз Коцура, архитетка Оля Ґнип зоз Дюрдьова, наукови виглєдовач Деян Павлович зоз Руского Керестура и линийски надпатрач транспорту ґазу Тарас Чапко зоз Дюрдьова.
Присутним представени шицки 19 кандидати на лїстини и їх кратки биоґрафиї, а гварене и же ше лїстина заклада за пременки, транспарентносц и фахово особи.
Дюрдьовчанє були заинтересовани, та давали думаня и суґестиї, алє и обрацали увагу на роботу остатнього зволаня НСР, тиж и же ше занєдзбує руски скарб нє лєм у Дюрдьове, али у цалей рускей заєднїци. Бешедоване и о Рускей школи, та и ґрунтових ришеньох будинкох котри хасную Руснаци, як и службеного хаснованя руского язика у општинскей управи Жабель.
Тото представянє було перше представянє було котрей лїстини у Дюрдьове за предстояци виберанки за членох Националного совиту рускей националней меншини котри буду на нєдзелю, 8. новембра.
