НОВИ САД – Предсидателька Комисиї за означованє шветох, додзельованє припознаньох и медзинародне сотруднїцтво у жеми и иножемстве и заменїца предсидателя Скупштини Городу Нови Сад Бранка Бежанов на конференциї за новинарох сообщела мена кандидатох за тогорочну Октоберску награду и Новемберску грамоту.
Музична младеж Нового Саду, Здруженє пензионерох Городу Нови Сад и новинар Ненад Чачич предложени за Октоберску награду за 2016. рок, а майстор Лайош Лукачи, котри ше 27 роки стара о годзинки на Петроварадинскей твердинї и директор Ґимназиї „Йован Йованович Змай” др Радивой П. Стойкович предложени за Новемберску грамоту.
На вчерайшей схадзки Комисиї прилапена и инициятива городоначалнїка Нового Саду Милоша Вучевича и Городскей ради же би лїкар и гуманиста проф. др Жан Пєр Лоц, директор онколоґийного шпиталю „Тенон” у Паризу, бул преглашени за почесного граждана Нового Саду.