БЕРКАСОВО – На ювилейней, 20. „Сримскей винияди”, хтора од 12. по 14. фебруар отримана у Беркасове, у змаганю за найлєпше биле вино були приявени 22, а у кетеґориї червених 14 вина. Вкупни побиднїк у катеґориї билих винох Дюрдїца Майхер з Илоку, з Републкики Горватскей, а найлєпше червене вино виложел Раде Комазец з Индїї.
Преглашени и найлєпши продукователє вина з Беркасова и околїска, дзе перше место за били вина освоєл др Димитриє Миятович, а за червени Иґнят Недич. Вино Мирослава Сокола того року освоєло 8. место.
Першираз були виложени и три „розе” вина, и у тей конкуренциї винаре Раде Комазец з Индїї, Пиньвица „Данґуба” зоз Шиду и Драґан Масловара, тиж зоз Шиду, достали окремни подзекованя.
Под час „Винияди” отримани и фахово преподаваня з обласци розвою валалского туризму, розвою туризму на Фрушкей Гори, як и прейґагранїчного сотруднїцтва у тей обласци.
Здруженє подобових уметнїкох зоз Шиду порихтало виставу малюнкох, а Єлена Лайтнер вибрана за красавицу „Винияди”.
