ОСИЄК – У орґанизациї КУД Руснацох Осиєку, у тим городзе всоботу, 6. децембра отримани ювилейни, Дзешати „Дравски габи” – стретнуце хорох и шпивацких ґрупох Руснацох у Републики Горватскей. Наступели шейсц руски дружтва з Горватскей, Матка словацка з Осиєку и КПД „Каршати” з Вербасу, з Войводини.
Коло 250 учашнїки и патраче мали нагоду послухац досяги наших хорох и шпивацких ґрупох з КУД „Осиф Костелник” з Вуковару, КУД „Яким Гарди” з Петровцох, КУД „Яким Ґовля” з Миклошевцох, КД Руснацох з Винковцох, Дружтва Руснацох „Руснак” з Петровцох, та з домашнього КУД Руснацох Осиєку, а Вербащанє участвовали з хором и жридлову ґрупу.
Члени КУД Руснацох Осиєку на програми першираз виведли композицию „Кум”, авторох своїх членох – музики Рудолфа Ерґотича и тексту Агнетки Балатинац, а з нагоди ювилею „Дравских габох”, на програми з двома танцами наступела и Фолклорна ґрупа КУД „Яким Гарди” з Петровцох.
Госцох и учашнїкох привитала предсидателька КУД Руснацох Осиєку Агнетка Балатинац, а спред Союзу Руснацох бешедовала його предсидателька Дубравка Рашлянин. Манифестацию отворел соборски заступнїк и рускей националней меншини Велько Кайтази.
Стретнуце отримане з финансийну потримовку Совиту за национални меншини РГ, соборского заступнїка Велька Кайтазия, Осиєцко-бараньскей жупаниї, Городу Осиєк, як и вецей спонзорох з Осиєку.
