ДЮРДЬОВ – З нагоди преслави 100-рочнїци од снованя Добродзечного огньогасного дружтва Дюрдьов, внєдзелю, 18. октобра орґанизована пригодна преслава.
На преслави присутних привитали предсидатель ДОД Дюрдьов Милош Малеш и командир ДОД Дюрдьов Желько Чович, котри после уводного слова и пречитаней краткей историї Дружтва госцом приятельом зоз ДОД зоз Шайкасшкей реґиї, представительом локалней и општинскей власци, представнїком огньогасцох зоз општинского, покраїнского и републичного союзу огньогасцох, спонзором и особом котри потримовали їх роботу уручели подзекованя и дарунки, погар, упаляч и клайбас. Окремни подзекованя достали почесни госци, а то старши оньогасци Ґоран Берич и Владимир Ковачевич.
Того вечара цали час на бини на були приказовани слайди зоз знїмками и сликами акцийох и членох ДОД Дюрдьов.
Преслава отримана у просторийох Културно-уметнїцкого дружтва „Тарас Шевченко”, котре им уступело просториї, а дзе после вечери було друженє.
