РУСКИ КЕРЕСТУР – Национални совит Руснацох, його Одбор за образованє, донирал опрему у вредносци од 100.000 динари Предшколскей установи Бамби, односно його оддзелєню Дзецинскей заградки Цицибан у Руским Керестуре.
Донацию, вчера, 23. октобра, уручел предсидатель Националного совиту Руснацох Стеван Самочета, а опрема наменєна унапредзованю роботи зоз дзецми предшколского возросту.
Донация облапя штампач у фарби, фарби за штампач, ламинатори, звучнїки, струнячи за дзеци, як и падобран за бавенє дзецох. Одлуку о додзельованю средствох принєсол Одбор за образованє Националного совиту Руснацох на єдней зоз скорейших схадзкох.
Як обгрунтоване, Национални совит Руснацох, през даванє стипендийох дзецом у предшколских установох у Коцуре и Дюрдьове стимулує їх познєйши упис до руских оддзелєньох до перших класох основних школох. Понеже предшколски дзеци зоз Руского Керестура школованє у першей класи Основней школи Петро Кузмяк вшелїяк предлужую по руски, одлучене же би ше часц средствох унапрямело и на потримовку предшколцом у тим валалє.
