РУСКИ КЕРЕСТУР – Прешлого тижня, у нєпогоди провадзеней зоз моцним витром и каменцом у Руским Керестуре, велька материялна чкода направена и на закрицу Основней школи „Петро Кузмяк”.
Нєдавно реновирана часц крова остала нєочкодована, алє проблем настал на старшей часци крова дзе плочи уж були дотирвали и нє меняни су од кеди вибудована школа. Накадзи чкода приявена, компетентни зоз кулскей Општини вишли на терен а, як гварела директорка тей Школи Наталия Будински, чкоду ше преценює на коло 10 милиони динари.
Понеже кров пре настати дзири од каменцу нє годно часточно покерпиц, алє лєм заменїц з новим, у наиходзацим периодзе ше будзе глєдац средства за тоту наменку же би ше цо скорей ришело проблем, и же би ше нови школски рок дочекало под безпечним закрицом.
