РУСКИ КЕРЕСТУР – На треци дзень Крачуна, вчера 27. децембра по вечаршей Служби Божей у Центре св. Йосафати, на отвореним, Дружтво св. Миколая на чолє зоз шестру служебнїцу Авґустину Илюк и їх приятелє, пририхтали Крачунску приповедку – живи Вертеп.
З найвекшей часци по тексту хтори з благословом владики Дионизия Нярадия на руским язику преложени и обявени 1939. року обдумана Крачунска приповедка. През подїї Исусового народзеня потолкована сущносц преславйованя того швета котру треба же би кажди християн доживйовал и нєшка, алє нє лєм на вонкашнї способ, алє глїбоко у стретнуцу з Исусом.
У автентично пририхтаним крачунским амбиєнту зоз хлївом – Вертепом, сламу, Осифом и Марию котри пришли зоз живим ошлїком, з огньом коло хторого ше грали пастире котрим ангели оглашели крачунску вистку, и з трома царами котри ше пришли поклонїц малому Исусови, о чим виронаучним дзецом толковали шестри Служебнїци, вельке число присутней публики, могло дожиц значенє Рождества Христового.
На концу орґанизована и крачунска томбола у котрей участвовали шицки присутни, а у цалей подїї велї помогли на рижни способи.
