КРАКОВ (ПОЛЬСКА) – Краковска видавательна хижа Scriptum обявела кнїжку на українским язику Епископ Дионизий Няради на фону културних и историйних спокусох у медзивойновим периодзе: интердисциплинарни погляд. Тота колективна моноґрафия видата з нагоди 85-рочнїци од шмерци владики Дионизия Нярадия, наукови редактор моноґрафиї професор Олег Белей зоз Вроцлавского универзитета.
У вецейавторскей моноґрафиї, хтора фокусована на грекокатолїцкого владику Дионизия Нярадия, авторе анализовали владиково творче нашлїдство зоз интердисциплинарней перспективи. Науково теми хтори обробени облапяю вецей обласци: еклисиолоґию, историоґрафию, линґвистику и литературни студиї.
Моноґрафия ма два часци. У першей часци тексти зоз историйней и вирскей обласци, а представени материяли обрабяю активносци Дионизия Нярадия як владики-администратора у Прешове и Хусту зоз перспективи сучасней историоґрафскей науки. Увага виглєдовачох була на преписки владики Дионизия зоз представнїками Мукачовскей епархиї и василиянских манастирох, у тей часци и пастирски и теолоґийни питаня. Друга часц пошвецена филолоґийним виглєдованьом.
Колективну моноґрафию о владикови Дионизийови Нярадийови видал Науково-виглєдовацки институт українистики „Михайло Мольнар” Ужгородского националного универзитету, а кнїжка вишла у сериї „Studia Ucrainica” котру у свой час основал визначни українски науковец професор Любомир Белей. Кнїжку мож опатриц на тим ЛИНКУ.