РУСКИ КЕРЕСТУР – Шнїг котри з претаргнуцами пада уж даскельо днї и далєй прекрива керестурски драги, тераз уж мож повесц, же ше жимскей служби удало порозчисцовац векшину драгох у валалє.
Вчера шнїг розґурани и на пияцу, на явних поверхносцох за паркиранє, и коло каплїци при теметове (дзе було розчисцене и на перши завод). Тераз после штирох дньох розчисцени и улїци котри на перши завод нє були, та шнїгу остало лєм на менших крижних драгох.
За розчисцованє шнїгу опрез обисцох, погосцительних обєктох, предавальньох и приватних подприємствох, би требали буц задлужени власнїки и гражданє, а обачлїве же нє розчисцене вшадзи, и же у валалє можебуц найчежше дойсц даґдзе пешо.
Отримованє медзимесних драгох под инґеренцию подприємства „Бачка драги”, док за отримованє драгох по населєних местох кулскей општини задлужени комунални подприємства, односно за розчисцованє шнїгу подприємство „Мако мил” доо зоз Руского Керестура котре ма подписани контракт о спомнутих услугох зоз кулским ЯКП „Комуналєц” у вредносци скоро 4 милиони динари.
Як Рутенпрес дознава, же би робота була ефикаснєйше и ажурнєйше поробена, домашнє ЯКП „Руском” єден дзень анґажовало ище Михайла Надя же би розчисцовал шнїг зоз трактором и лопату за розгартанє.
Попри тим, и валалчань Звонко Рац самоинициятивно и добродзечнє розчисцел шнїг на улїци Ирини Провчи зоз обидвох бокох, як и драгу до Водици, бензинску станїцу, рибалов Русин, та улїци Владимира Назора, Партизанску, Беґельску, и Першу и Трецу улїчку на Новим населєню. Исти дзень, Рац помогнул розчисциц и шнїг у центру валала.
Шнїгу ше у валалє наисце радую дзеци котри ше санкаю, шлїзкаю, оруцую, и правя дїда шнїжнїка, опрез обисцох, на базену, на беґелю, або у паркох.
