Фотоґраф, знїматель, режисер, професор на Академиї драмскей уметносци у Заґребе, а, насампредз оцец и чловек, Силвестар Колбас добре памета кажди крочай на своєй драги. Од дзецинства, котре препровадзел у Петровцох и Винковцох, по спокуси на професийним плану. Колбасово филми и фотоґрафиї характеризує нїтка автобиоґрафского елементу.
Силвестар Колбас ше народзел у Петровцох, 12. априла 1956. року. Гоч нїґда там нє жил, вон и його брат, як дзеци, вельо часу препровадзели у баби Юстини. За тот час го вяжу красни памятки – скромна хижа и домашнї животинї цо бегали по дворе.
– Родичи робели у Чачинцох кед мац була ваготна зо мну, а з оглядом на тото же єй родичи помарли, а же би мойо народзенє прешло так як треба, оцец ю приведол до своєй мацери до Петровцох, та сом ше там народзел. Баба жила сама, нє було вельо пенєжи та шила, ткала, конопу мочела, робела у загради, кармела статок, а попри шицкей роботи мала мерковац на мнє и младшого брата. Любел сом сцекац на улїчку, та баба зоз старих рендох завязала клянку же бим нє могол висц на улїчку, алє вец нїхто нє могол войсц. Потим ю так завязала же би було же є завязана, алє нє була, та сом раз-два здумал як ознова сцекнуц. Стало ми ше и таке же сом у сушеди заглобел главу до колєса на польопривредней машини, та сом ше почал надзерац. Сушеда нє знала як помогнуц, алє баба ме виратовала – добре памета Силвестар.
У обисцу одгуковала руска бешеда
Концом пейдзешатих рокох Силвестарова баба Юстина предала хижу у Петровцох, та зоз тим помогла же би ше направело хижу у Винковцох. Збудовало ше вельку хижу, долу жили Силвестар, младши брат Мирослав и родичи Йозафат и Катица, а на поверху оцова шестра, єй чловек и їх два дзивки. Баба жила вєдно з нїма, а бешедовало ше по руски.
И попри тим же його мац була Горватка, научела бешедовац по руски. Шовґор Ириней мал вельо братох и шестри, та часто приходзели до нащиви, так же ше у обисцу вше бешедовало по руски.
– Понеже сом нє мал нагоду учиц руски язик у школи, мой вокабулар вязани за обисце, обрабянє жеми, валал – прето ми дараз хиби же нє знам модерни и фахово слова, алє, и попри тим, я ше чувствуєм богати же знам два язики и култури – надпомина Силвестар.
Любов ґу фотоґрафиї почала у основней школи. Учитель биолоґиї, Руди Филипс, водзел фото-секцию и вон го уведол до того. Учитель подобового воспитаня, Иван Ґосаин, тиж преширел його знанє о фотоґрафиї.
– По законченей основней школи сом пошол цошка робиц до лєса, дзе сом дакус заробел пенєжи, ґу тому и оцец дакус доложел, та сом себе за Нови рок купел машину за виробок фотоґрафийох. Зоз малей просториї котру ше нє хасновало ми направели „цму хижу”, положели стол, полїчки, чоп з воду, та сом там почал вирабяц свойо перши фотоґрафиї. Ту сом видзел же можем направиц дацо свойо.
Гоч му добре ишли природни науки, ришел же ше нє упише до ґимназиї, алє до штреднєй Технїчней школи „Рудєр Бошкович” у Винковцох.
Академия – швет филму и фотоґрафиї
Свойо фахове усовершованє Силвестар предлужел на Академиї драмскей уметносци у Заґребе.
– Стало ше так же оцец по роботи ишол до Заґребу, а я му гуторел же би ми купел часописи о фотоґрафиї, медзитим, нє нашол их. На улїчки стретнул чловека котри ношел фото-маґазини. Оцец му през бешеду гуторел же ше я интересуєм за фотоґрафию, а чловек праве закончовал Академию, та му препоручел же бим ше на ню уписал. Я знал за ню, алє то була филмска академия, а мнє то нє интересовало. Медзитим, вон гуторел же ше досц роби и зоз фотоґрафию, пре филм, и же ше я там пренайдзем. Познєйше ми помогнул же бим ше пририхтал за примаци испит и положел го зоз першого. Тот чловек то Крешимир Микич. Студентски днї у Заґребе були скромни, жил сом у поєднаним квартелю зоз пайташом, робел сом дакус за новини же бим заробел пенєж з боку, а помагали ми и родичи. Часто ми посилали рижни пакети зоз єдзеньом и облєчивом – нє забул Силвестар.
Гоч кельо од нєй сцекал, Заґребска телевизия го дочекала
По законченей Академиї Силвестра и далєй интересовала фотоґрафия. Перше почал робиц єдну файту фотоґрафскей сериї, з котрей требала буц моноґрафия „Стари ремесла у Горватскей”, було то у периодзе медзи 1981. и 1984. роком.
– З мою першу жену зме вельо того зробели, алє нїґда нє докончене, а народзел ше и син Яков. Теди сом ше явел на оглашку за роботу на телевизиї и за мали пенєж сом знїмал репортажи. З оглядом на тото же сом мал познанства, дзеку и знанє, часто сом робел и бавени и документарни филми, ТВ драми… Интересантне тото же кед ше знїма вистку, найважнєйше же ши там бул и знял материял, а менєй важне як то направене. У других файтох знїманя важнєйше як то зробене. Я ше праве у тим видзел. После даскелїх рокох сом требал прейсц на таку файту емисийох, алє починала война. Врацел сом ше на информативну програму, у Винковцох зме мали базу, а понеже сом там одроснул, терен ми бул познати. Поряднє сом робел репортажи о войни – приповеда наш собешеднїк.
Робота на филму
Кед го 1994. року поволали же би преподавал на Академиї, зохабел телевизию, алє ище робел як вонкашнї сотруднїк. Року 1996. достал званє доцента, а з часом здобул статус порядного професора у тирвацим званю. Война на пана Силвестра зохабела єден окремни шлїд котри го длуго корцел, покля му його продуцент нє дал идею…
– Зоз продуцентом мойого першого филма, „Шицко о Еви”, Ненадом Пуховским, предлужел сом сотруднїцтво на єдним филму о войни. Вон теди обачел же мнє ище вше цошка трапи зоз того часу, та ми совитовал же бим опатрел у архиви свойо, алє и други знїмки зоз войни. Робота на другим филму „Воєни репортер” тирвала седем роки прето же сом глєдал тото цо ме вязало за войну, чом нє можем добре спац итд. Филм барз особни и нє указує гевто цо було доминантне у медийох, алє же война на каждого зохаби нєдобри пошлїдки и же важни боль каждого чловека.
Колбасово филми и фотоґрафиї характеризує нїтка автобиоґрафского елементу. Гоч ше уписал на Академию, нїґда нє думал же єдного дня будзе знїмац филми. Гуторел же му було досц направиц добру фотоґрафию. У медзичаше ше розишол зоз першу жену и повинчал ше зоз другу, Наташу, алє нє могли достац дзецко. Бул то початок першого филму…
– У документарцох сом од собешеднїкох глєдал же би були щири, отворени и же би указали свойо бриґи пред камеру. Потим сом подумал же то глєдам од других, а же тераз я мам таке дацо у своїм живоце. Жена и я ше догварели же будземе документовац нашо пробованя же бизме достали дзецко. Мали зме догварку же як будзе, будзе – гоч як ше закончи, алє филм направиме. Ишли зме по дохторох, документовали материял и удало нам ше. Достали зме дзивче Еву и так 2003. року настал мой перши филм „Шицко о Еви”, кед сом мал 47 роки. Потим як филм бул обявени, велї ми гуторели же ше пренашли у нїм и же ше зочовали зоз подобнима проблемами – задовольни Силвестар.
Робота пана Силвестра на филму и фотоґрафиї нє вше класична, люби експериментовац, а зоз того настали удатни проєкти:
– Мнє ше пачи дац даяку нову форму тому цо робим. Єден таки проєкт настал кед ми було цикаве преврацац у Отечественей войни по зруйнованим кину, библиотеку у Винковцох. Там сом пренашол фалатки старих пантлїкових филмох, котри сом принєсол до Заґребу. Аж после 15 рокох сом ше одшмелєл отвориц мещок и препатриц тото цо сом пренашол. Були то стари журнали, котри ше пущало пред филмом. Як хлапец и леґинь сом одходзел до того кина, а у библиотеки ми мац робела, так же сом бул вязани за тото место. Проєкт у котрим сом обробел пренайдзени материял наволал сом „Биоскоп Червена гвизда”, як ше наисце и волал, у рамикох котрого сом направел експериментални филм и виставу фотоґрафийох, дзе сом представел свой попатрунок на войну и як сом ю прежил у Винковцох.
Силвестар Колбас тераз у пензиї, алє вше дацо роби. Шлєбодни час, заш лєм, виполня фотоґрафия и филм. Тераз роби на филму о гайзибану „Самоборчек”, котри дараз ишол на релациї Самобор–Заґреб.
За кажди период свойого живота пан Силвестар ма даяку приповедку. Так и за фамелию котра преросла до филму.
– Препоручел бим же бисце одпатрели мой остатнї филм хтори обявени 2024. року, а вола ше „Нашо дзеци”. Моя друга жена, Наташа, и я маме тройо дзеци. Мам сина Якова зоз першого малженства (ма 40 роки), алє вон и нашо дзецко, Наташа го барз добре прилапела. Друге дзецко нам Ева (ма 23 роки) о котрей зняти филм, а потим зме 2008. усвоєли ище єдного хлапца Анту (ма 25 роки). Нашо обисце нєтипичне и часто ше ствари поскладаю на рижни способи, та ми продуцент предложел най направим филм о тим. Идея ми ше попачела и думал сом же ми ше през єдно лєто уда зняц потребни материял, медзитим, нє випадло так. Робота на филму тирвала вецей як дзешец роки. Ридко єст филми у хторих родичи „огваряю” свойо дзеци, а то праве таки филм, зоз угла родителя – наглашує автор.
После премиєри филма ше указало же ше велї просеково фамелиї пренаходза у нїм (як родичи, або дзеци). Филм специфични и по тим же ше класични филми нє знїма на таки способ.
На самим концу, през искуство динамичного и виполнєтого живота, пан Силвестар Колбас младим совитує:
– Млади людзе вецей посцигню кед робя тото цо им цикаве, а нє кед штудираю цо будзе другим интересантне, нам як професором, лєбо публики… Пробуйце робиц и пренайсц свою драгу!
Припознаня за роботу
За перши филм „Диплома за шмерц”, котри направел як знїматель, достал Грамоту за найлєпшого дебитанта знїмателя на Фестивалу „Милтон Манаки” у Битоли. Филм „Воєни репортер” му принєсол Рочну грамоту „Владимир Назор” за филмску уметносц за 2011. рок, а вона найвисше припознанє у Горватскей тей файти. На Пула филм фестивалу 2024. року достал Златну арену за найлєпшу режию за филм „Нашо дзеци”. Зоз ню ше найбаржей пиши, прето же у конкуренциї рижни жанри филмох, алє и добри и познати режисере.
Спомли зме лєм даскельо припознаня, медзитим, як пан Колбас заключел, вон нє роби пре грамоти, алє вони резултат препознатей, квалитетней и успишней роботи.