РУСКИ КЕРЕСТУР – У парохиї св. оца Миколая, 6. януара означене швето Богоявления Господнього, Трокралї. Дзень пред тим була Трокральова Вилїя, дзень на котри ше вирни притримую звичайох котри подобни як и на крачунску Вилїю, зоз подобнима єдлами, та тот дзень и наволани же є мали Крачун.
Вовоторок, 6. януара после Служби Божей на 10 годзин пошвецена вода зоз читаньом молитвох над воду, а у тим участвовал о. Владислав Варґа, о. Михайло Шанта, о. Владимир Медєши, о. Ярослав Варґа. После тей Служби у порти людзе себе дому однєсли швеценей води, котру похасную за пошвецанє обисцох, котре почина на штварток, 8. януара.
Воду ше пошвеца на швето Богоявлениє каждого року, а вона на хасен духовному и тїлесному здравю шицким парохияном. З пошвецену воду о. Владимир Медєши пошвецел цалу церкву и присутних.
После пошвецаня богоявлєньскей води у церкви о. Владислав Варґа зоз читаньом молитви урядово завар Ювилейни рок, алє визначел же о осем роки, 2033. року знова будзе нагода за полни одпуст.
