КОЦУР – После длугей хороти стреду, 7. януара, упокоєла ше писателька и поетеса за дзеци, подобова уметнїца и наставнїца у пензиї Серафина Макаї зоз Коцура.
Серафина, дзивоцке Буила, народзена 21. септембра 1945. року. Основну школу закончела у Коцуре, а Висшу педаґоґийну школу у Зренянину на ґрупи за сербски язик и литературу. Робела як библиотекарка у Читальнї у Коцуре осем роки, кратко у Стреднєй школи у Вербаше, а потим по одход до пензиї як наставнїца сербского и руского язика и литератури у Основней школи Братство єдинство у Коцуре.
Як библиотекарка перша написала историю коцурскей Читальнї од снованя, а по валалє поглєдала и покупела стари руски кнїжки. У коцурскей школи велї роки водзела литературну секцию, а сотрудзовала и зоз часописами за дзеци и участвовала зоз школярами на литературних конкурсох. Достала и числени припознаня и награди. Тиж, сотрудзовала вєдно зоз школярами зоз телевизию и радийом, дзе єй зняти велї ТВ и радийски емисиї.
Серафина Макайова писала од вчасней младосци, за младши и старши дзеци поезию и прозу, драми за дзеци, як и монодрами. Обявени єй вецей кнїжки за дзеци – Фестивал животиньох, Вчера сом ше ошацовал, Бавме ше на бини и други. Єй твори обявени и у числених зборнїкох и антолоґийох, а написала и вецей монодрами за Фестивал монодрами у Новим Садзе. Написала и велї гумористични тексти, а компоновани єй числени писнї за дзеци и старших за нашо музични фестивали.
Окрем писаня, Серафина мальовала на склу, и отримала вецей самостойни вистави, а тиж участвовала и на вецей заєднїцких виставох по рижних местох. Участвовала на числених подобових колонийох, єй дїла заступени у Подобовей моноґрафиї, а вєдно зоз супругом Силвестером, визначним подобовим педаґоґом и уметнїком, и дзецми сином Ромком и дзивку Наташу прикрашела мури амбулантох у Коцуре и Старим Вербаше.
Намагала ше збогацовац змист и роботу Дружтва за руски язик, литературу и културу, чий член була од 1974. року. Була член Дружтва писательох Войводини, член Литературней секциї у Коцуре и член Дружтва подобових уметнїкох аматерох у Вербаше.
Жила зоз фамелию и творела у Коцуре, дзе будзе и похована на пияток, 9. януара на 12 годзин. Фамелия будзе примац сочуство у каплїчки на пияток од 10 годзин.