НОВИ САД ‒ У Конкатедрали св. апостолох Петра и Павла, 6. януара, на 9 годзин служена Вечурня зоз Литурґию св. Василия Велького, а вечар на 21 годзин Вельке повечериє з литию, а потим було и колядованє и друженє у Доме святого Миколая.
На перши дзень Крачуна дополадня була Служба Божа з мированьом, хтору служел парох о. Дарко Рац, апостол читал Иван Лїкар, дзияковали Александер Планкош и Александар Саванович, шпивал Хор новосадскей конкатедрали святих первоверховних апостолох Петра и Павла.
У своєй казанї о. Дарко Рац повинчовал щешлїви и радосни швета Рождества Христового зоз словами же шицким вирним и людзом добрей волї жичи же би спознали и же би почувствовали тот мир хтори ангели нависцели пастиром, а то мир у шерцу, мир у дружтву, мир медзи народами… Потим парох Рац вирним пречитал винчованку владики кир Георгия Джуджара за швето Рождества Христового.
На други и треци дзень Крачуна Служби Божо буду на 10 и на 18 годзин, у шицки службох будзе мированє.
