БЕОҐРАД – Найлєпшим школяром основних школох „Змагательом ґенерациїˮ, хтори посцигли вершински резултати на републичних и медзинародних змаганьох, 24. децембра у Скупштини Сербиї додзелєни плакети и награди, а медзи наградзенима и – Андрей Рац зоз Нового Саду, Янко Рац зоз Кули и Алекса Бокан зоз Нового Саду.
Школяром награди уручели министер просвити проф. др Деян Вук Станкович, министер спорту Зоран Ґаїч и директор канцелариї за ИТ и еУправу, др Михаило Йованович.
Наградзени 127-еро найлєпши школяре, од хторих 86 з обласци науки, 33 з обласци спорту и осмеро з обласци уметносци.
Мена шицких наградзених школярох буду на платформи „Змагателє ґенерациїˮ хтора наменєна промовованю школярох хтори освоєли вершински резултати на републичних и медзинародних змаганьох зоз спомнутих трох обласцох.
