РУСКИ КЕРЕСТУР – На керестурским теметове, вчера, 28. децембра поховани Томислав Регак, дакедишнї фодбалер, ґолман и тренер, та длугорочни церковнїк катедралней церкви св. Миклая.
Томислав Регак народзени на Миколая 6. децембра 1943. року, а упокоєл ше на перши дзень Крачуна, 25. децембра у 82 року живота.
У младосци бул активни у младежскей организациї, а у ФК Русин фодбал почал бавиц од 1956. року у пионирох, вец за перши тим дзе бул перше ґолман, вец бавел на месце кридла та бул и ґолґетер. Перши ґолман Русина постал 1961. року, а найлєпше бранєл кед ше Русин намагал войсц до Бачкей лиґи. Року 1971. пошол бранїц до Лалитю до ФК Панония, до Русину ше врацел 1974. и одпитуюце змаганє одбавел 1977. року. Положел испит за тренера з медзинародну лиценцу, та тренирал и пионирох и першотимцох Русина, а фодбалску кариєру закончел 1986. року. На Скупштини Спортского дружтва Русин 2001. року вибрани є за почесного члена. З нагоди 100-рочнїци ФК Русин 2023. року достал припознанє.
Томислав бул виучени шлосер, а остатнї 18 роки до пензионованя робел у Друкарнї Руске слово у Руским Керестуре. Вєдно зоз супругу Марию були и столнотенисере, а у дозретих рокох и активни рекреативнци бо 30 роки у школскей сали водзели рекреацию окреме за жени и хлопох.
За члена Церковного одбору керестурскей парохиї вибрани є 1999. року, а од 2003. прилапел ше и длужносци церковнїка и дзвонара катедралней церкви св. о. Миколая. Окончовал ю вецей як 21 рок, до пред пол рока, кед му нє допущела хорота. Службовал у чаше трох парохох, а єдного и поховал, на вельких и нєкаждодньових историйних подїйох од снованя нашого Еґзархату, а вец и Епархиї, рижних рочнїцох Церкви и Водици кед приходзели визначни госци, з цалого швета, випровадзаня трох наших владикох, Сеґедия и Гербута котри були поховани у церкви, а кед умар владика Славомир и шицки пейцме су премесцени до новей крипти под катедралу. За шицко тото требало буц знаходлїви, точни и окончовац шицко з вельку дзеку и любову. А праве так то робел и Томислав Регак.
За собу зохабел супругу Марию з котру пожили 62 роки у малженстве, и синох Желька и Златка зоз фамелиями.
Вичная му памят!