РУСКИ КЕРЕСТУР – У красним амбиєнту коло керестурского базену всоботу 29. априла отримани Явни ярнї тренинґ зоз мотом „Порушай ше, направ перши крочай… Опредзель ше за здрави живот”, на котрим наступели рекреативци и мали спортисти двох русинових клубох.
Главни спонзор Ярнього явного тренинґу була Месна заєднїца (МЗ) Руски Керестур, котра помогла коло його орґанизациї иницияторки Мариї Гарди. Циль тренинґу бул презентовац здрави животни стил през здраве костиранє и физичну активносц як насущну потребу.
На Явним тренинґу наступели школяре з Атлетского и Карате клубу „Русин” котрих водза тренере Саня Еделински и Михал Орос одн. Анамария Няради, наступели и учашнїци двох старосних ґрупох „Рекреациї за жени” котрих водзи Лїляна Еделински. Госцински були Фетнес ґрупа „Порушай ше” з Нового Саду котру водзи Йована Симич, а представела ше и ґрупа „Fitness walk” котру водзи Мария Гарди. Тиж бул и мини маратон „Беж за здравє” котри орґанизовала Ясна Тасич.
О здравим костираню присутних здогадла нутриционистка Михаела Милинкович, а Явни тренинґ и важносц физичней активносци за здрави психофизични живот попри нєй потримала и вецейнїста шветова шампионка у боди билдинґу Илона Гека Зарубица.
Учашнїки ше ошвижели и зоз овоцу и желєняву цо спонзоровала МЗ, зоз швижу лимунаду зоз кафичу Мала оаза, а Ясна Тасич и єй Fingers food обезпечели интеґрални кекси. На тренинґу попри учашнїкох було, алє могло буц и вецей нащивительох, младих родичох зоз дзецми, а тиж и старших.
