СЕРБИЯ – Габа протестох, сходи гражданох як потримовка студентом лєбо пре даванє почесци настрадалим на Желєзнїцкей станїци преширела ше и на менши места и населєня.
Гражданє найвецей виходза пиятками на 11:52 годзин на векши розкрижя и блокираю транспорт, а даґдзе виходза и каждодньово.
У општини Вербас нєшка на 11:52 годзин гражданє буду стац у Вербаше на Площи Николи Пашича, у Коцуре у центре, у у Змаєве опрез Месней заєднїци. На 11:30 годзин сход будзе у центре Бачкого Доброго Поля. Истого дня на 18 годзин сход будзе опрез Крижа (при Шелерови). У Савиним Селу сход заказани на нєдзелю, 2. фебруара у центре.
Нєшка на 11:52 годзин сход будзе на Ченею опрез Месней заєднїци.
У Ветернику наявене протестне шейтанє нєшка на 18 годзин, а як ше наводзи на дружтвених мрежох сход при кружним цеку и шейтац ше будзе по улїцох Краля Александра, Войводи Бойовича и Краля Петра.
У Катю, сход заказани на углє улїцох Краля Петра I и Сави Малешева нєшка на 17 годзин.
У Жаблю гражданє уж два тижнї потримую студентох, орґанизую сходи кажди дзень на 11:52 годзин при будинку Општини.
Протестни сход будзе нєшка у центру Чуроґа на 11.52 годзин.
Сход гражданох „Деспотово зоз студентами и професорами” будзе нєшка на 11:30 опрез Месней канцелариї, вони наявели же буду стац 16 минути – 1 минута пошвецена хлапцови хтори настрадал прешлого року у Бачкей Паланки, кед после бурї нє 12 днї нє склонєни дроти под напоном.
У Пиньвиц гражданє ше зиду на 11:45.
У Бачкей Паланки сход будзе нєшка на 11:52 опрез робней хижи. Гражданє буду стац 16 минути. На нєдзелю сход будзе отримани опрез Технїчней школи „9. май” на 18 годзин.