РУСКИ КЕРЕСТУР – Ище на ютре, стреду, родичи можу уплациц за пакецик своїм дзецом, хтори св. Миколай (по григориянским календаре) традицийно будзе даровац у Катедралней церкви пред шветом, 5. децембра, на 18,30 годзин. Пакецик кошта 400 динари.
Як Рутенпрес дознава од пароха о. Михайла Малацка, до вчера було уплацене за 125 пакецики, а сто пакецики обезпечени за дзеци зоз загрожених фамелийох. За тоти пакецики пенєж даровали парохиянє, сама парохия, а 20 пакецики обезпечує Церковни одбор.
З нагоди св. Миколая шестри Служебнїци и того року за дзеци зоз социялно загрожених фамелийох орґанизую и окремну акцию, наволану „Писмо Миколайови”, у хторей дзеци зоз спомнутих фамелийох Миколайови написали свойо жаданя. Шестри поволую же би ше до тей акциї уключели и парохиянє котри можу помогнуц, и до штвартку най ше явя шестром до манастиру.