ВЕРБАС – Руководительство Општини Вербас прияло вимоги роботнїкох Предшколскей установи „Бошко Буха”, котри прешлого тижня протестовали опрез будинку Општини пре пожнєнє у виплацованю плацох.
Предсидатель Општини др Братислав Кажич гварел же є порихтани бешедовац о проблемох з котрима ше зочели заняти у ПУ, алє визначел же и вони муша буц свидоми економского моменту и позициї у хторей тераз Општина Вербас.
– Знам же им пожнї плаца и то нє тайна, алє то так и у других подприємствох. Ми з приходом на власц нашли буджет потрошени рок напредок, Општина муши плациц чечуце дїлованє и виплацовац плаци, а з таким прилївом яки маме, виплацованє плацох нє можлїве мешац за мешац – гварел Кажич.
У ПУ єст 174 занятих, за їх плаци у тим року плановани 130 милиони динари, плус 18 милиони за чечуце трошенє, дзе и пенєж хтори сами заробя. Вєдно 15 одсто средствох рочного општинского буджету наменєни тей установи.
– За позитивни одвит на їх вимоги и моменталне виплацованє по єдней и пол плаци потребни нам 17,5 милиони динари, а то би значело же бизме мушели престац помагац спорт, виплацовац трошки путованя школяром студентом, пензионером, як и друге, цо би загрожело дїйствованє у Општини – визначел Кажич.