КУЛА – Вчера, 12. новембра у Кули, односно у кулско-липарским хотаре (на Телечкей висоровнї), шветочно отворени перши витропарк у Сербиї за продукцию електричней енерґиї. Власнїк и инвеститор витропарку компания „МК Финтел Винд”, як заєднїцка компания италиянскей „Финтел Енерґиї Спа” и Компаниї „МК ґрупи” основаней 2007. року и єдна є з перших у нашей жеми хтора ше занїма з продукцию такволаней желєней енерґиї.
Витропарк до роботи службено пущел министер рударства и енерґетики Александар Антич, котри з тей нагоди визначел же нєшкайши дзень вельки за Сербию понеже доставаме перше таке жридло обновююцей енерґиї.
– Дзень у хторим Сербия достава перши витропарк и потвердзенє добрей политики Влади Сербиї у обласци енерґетики, понеже з вецей стимулативнима мирами обезпечи вибудов векшого числа капацитетох з обновююцих жридлох енерґиї. Пошвидко прилапиме и три уредби хтори буду дефиновац нови модел контрактох о одкупу електричней енерґиї з обновююцих жридлох, хтори оможлїви векшу сиґурносц инвеститиром за укладаня до витропаркох и других таких капацитетох. По 2020. рок, учасц такей енерґиї у финалним трошеню Сербия з терашнїх 21 планує звекшац на 27 одсто – гварел министер Антич, наглашуюци же з планованей продукциї од 1 092 меґавати, з витроелектрарньох ше будзе продуковац 500 меґавати електричней енерґиї.
Вивершни директор италиянскей компаниї „МК Финтел Винд” Тицияно Дьованети на шветочним отвераню визначел же до того першого витропарку у Кули уложени 15 милиони еври, пририхтованя тирвали коло седем роки, а саме поставянє трох витроґенераторох швидко закончене, понеже почало у фебруаре того року.Витроґенератори високи 178 метери и найвисши су у юговосточней Европи, а построєнє моци 9,9 меґавати будзе продуковац коло 27 милиони киловат-годзини желєней електричней енерґиї, цо досц за коло 8 000 ґаздовства. Як гварел министер Антич, витропарк енерґию будзе уруцовац до системи Електропривреди Сербиї (ЕПС), цена киловат-годзини 9,2 евроценти, а тота розлика медзи трансферну цену хтору ЕПС достава зоз своєй продукциї и цену хтору ше достанє з обновююцих жридлох, на рахункох терошительох приказана як желєна такса.
Инвестицию у Кули кредитно провадзела Ерсте банка, так же на отвераню бешедовал и предсидатель Вивершного одбору тей Банки Славко Царич, а уж вчера наявене же иста компания хтора збудовала тот у Кули, пошвидко почнє будовац и подобни витропарк коло Вершцу, вредносци коло 11 милиони еври.
Министер рударства и енерґетики Александар Антич вчера наявел вибудов таких енерґетских капацитетох и у других часцох Войводини, та коло Дунаю и других обласцох Сербиї.
