ШИД – Вчера у просторийох Општинского одбору Сербскей напредней странки (ОО СНС) у Шидзе отримане преподаванє о историї Руснацох, а викладали мастер русинистики Зденко Лазор и член Совиту за национални меншини Городского одбору СНС Нови Сад Миломир Шайтош.
Професор Лазор присутних упознал з тим же хто Руснаци, кеди ше приселєли на подруче Войводини, а окреме виложел присельованє Руснацох и їх розвой у местох нєшкайшей шидскей општини, насампредз у Шидзе, Бачинцох, Бикичу и Беркасове. Лазор бешедовал и о образованю, информованю и релиґиї Руснацох и на тот способ представел досяги рускей националней заєднїци.
Миломир Шайтош бешедовал о походзеню Руснацох, просторох дзе дакеди жили и одкаль ше присельовали до Войводини. Винєсол и податок же 19 Руснаци на Велькей народней Скупштини потримали придружованє Войводини ґу Кральовини Сербиї после Першей шветовей войни.
Шайтош винєсол и податки о нєшкайшим положеню Руснацох у Републики Сербиї, за хтору гварел же є матична держава Руснацом, як и други держави тамтейшим Руснацом. През историйни подїї, Шайтош наглашел вельки страданя Руснацох у войнох, як и податок же Руснаци нїґда нє були крипаки, алє „народ шлєбодней селїдби”.
Орґанизатор преподаваня були Совит за национални меншини ОО СНС Шид и Уния женох ОО СНС Шид, а присутних на початку привитал предсидатель спомнутого совиту Зоран Гарди.
