РУСКИ КЕРЕСТУР – У рамикох програми „Костельниковей єшенї” школяром руских оддзелєньох Ґимназиї „Петро Кузмяк” вчера представена кнїжка критикох, оглядох и есейох „Галов” Ирини Гарди Ковачевич и три кнїжки поезиї – „Слово Бояна Двокраяна” Владимира Бесерминя, „Осце и черешнї” Агнети Бучко Папгаргаї и „Гришка” Асї Папуґа.
Спомнути кнїжки кратко представел одвичательни редактор Вудавательного оддзелєня у НВУ „Руске слово” Микола Шанта, як и їх рецензенти. Кнїжку критикох „Галов” ґимназиялцом презентовала и сама авторка Ирина Гарди Ковачевич, як и рецензентка Олена Планчак Сакач.
О поезиї дакедишнього професора керестурскей Ґимназиї, тераз покойного Владимира Бесерминя, пречитана рецензия Каролини Папуґовей, а Шанта пречитал и єдну його писню.
О литературней роботи и поезиї Агнети Бучко Папгаргаї, як и єй найновшей кнїжки „Осце и черешнї” бешедовал Микола Шанта, док сама авторка школяром пречитала писню зоз спомнутей збирки „Нє аметис, анї жад”.
Кнїжку „Гришка” младей поетеси Асї Папуґа, дакедишнєй школярки керестурскей Школи, попри Шанту, з виривком своєй рецензиї презентовал и Ваня Дула, а авторка школяром подаровала даскельо свойо стихи и єдну кнїжку.
У програми участвовала и шпивачка Ана Римар з Нового Саду, котра а капела одшпивала шпиванку „Чайки”. На самим початку програми школярох и госцох привитала директорка Школи Хелена Пашо Павлович.
