БЕОГРАД/СРИМСКА МИТРОВИЦА – За збирку поезиї „Ґеоґрафия памяткох” („Географија успомена”), Ясна Димитришин Арбанас зоз Сримскей Митровици достала трецу награду, грамоту и уметнїцки малюнок на тогорочним Медзинародним Сайме кнїжкох у Беоґрадзе.
Ясна Димитришин Арбанас трецу награду у катеґориї „збирка поезиї” достала на Медзинародним литературним конкурсу Литературней младежи Сербиї (Књижевна омладина) „Пеґаз”, на хтори у штирох катеґорийох сцигли аж 882 рукописи зоз Сербиї и иножемства, а 20 вошли до узшого вибору.
Димитришин Арбанасова активна у рускей заєднїци у Сримскей Митровици, народзена є 1962. року у тим городзе, дипломовани є правнїк, робела як професор и директор Економскей школи „9. май”, а од 2006. по 2014. рок була директор Историйного архиву „Срим”. Велї роки рецитовала, а як професор-ментор, зоз штредньошколцами посциговала значни резултати на змаганьох у рецитованю и бешеднїцтве. Водзи Школу бешеднїцтва и вельорочни є предсидатель Фестивалу бешеднїцтва. Ясна и малює, так же участвовала на виставох и подобових колонийох у Новим Садзе, Руми, Бечею, Шиду, Суботици..
Збирка поезиї єй перша обявена кнїжка, дзепоєдни писнї з тей збирки уж преложени и на руски язик, а промоция наградзеней кнїжки Ясни Димитришин Арбанас пошвидко будзе у Сримскей Митровици.