РУСКИ КЕРЕСТУР – У рамикох вчерайшей програмох „Костельникове єшенї”, єй часци за школярох висших класох, свою литературну роботу представели писателька и редакторка часопису „Заградка” Мелания Римар, та Ксения Лїкар з Миклошевцох.
Римарова наглашела свойо причини прецо пише за дзеци, а школяром пречитала єдну свою новшу приповедку. Тиж визначела же почала зазберовац руски народни писнї за дзеци, поволала школярох же би у тим помогли, а пречитала и єдну таку писню.
Школяром свою творчосц представела и Ксения Лїкарова, бешедовала о початку писаня по руски, гоч єй то нє мацерински язик и пречитала даскельо писнї зоз збирки „Дуга мойого дзецинства” хтора, як наглашел одвичательни редактор Видавательного оддзелєня у НВУ „Руске слово” Микола Шанта, будзе видата нарок.
И у тей часци програми наступела шпивачка Ана Римар, а о значеню „Костельниковей єшенї” и чесци же би була отворена праве у керестурскей Школи, бешедовала єй директорка Хелена Пашо Павлович.
