РУСКИ КЕРЕСТУР – З представяньом писньох за младши дзеци з двох кнїжкох у рукопису – „Котульки и ґомбульки” Ирини Гарди Ковачевич и „Дуга дзецинства” Ксениї Лїкар, вчера у Руским Керестуре, у Школи „Петро Кузмяк”, почала тогорочна 22. Културна манифестация „Костельникова єшень”.
През активну розгварку зоз школярами шицких нїзших класох ОШ, поетеси Ирина Гарди Ковачевич и Ксения Лїкар пречитали по даскельо писнї з будуцих збиркох, хтори НВУ „Руске слово” обяви идуцого року. Ирини Гарди Ковачевич з Нового Саду то будзе пията кнїжка за дзеци, а Ксения Лїкаровей з Миклошевцох, з Горватскей, перша.
На початку вчерайшей програми, хтора отримана у голу керестурскей Школи, поетеси, присутних госцох котри участвовали у програмох, дзеци и просвитних роботнїкох привитала директорка Школи Хелена Пашо Павлович, а поетеси представел одвичательни редактор Видавательного оддзелєна „Руского слова” Микола Шанта.
На вчерайшей програми виведзена и єдна музична точка, понеже дзецом нашу познату шпиванку „Цихо, цихше, помали” а капела одшпивала Ана Римар з Нового Саду.
