РУСКИ КЕРЕСТУР – Други дзень Културней манифестациї „Костельникова єшень” всоботу, 7. новембра, у Церковней сали у Руским Керестуре отримана литературно-музична програма на хторей предствени музични компакт-диск „Керестурски штири дзвони” и три нови кнїжки поезиї наших авторох – „Гришка” Асї Папуґа, „Вселенска черкотка” Миколи Шанту и „Слово Бояна двокраяна” Владимира Бесерминя, у виданю НВУ „Руске слово”.
О ЦД-у, знятим у авґусту того року, на хторим 13 нашо и українски народни шпиванки шпива вокални квартет – о. Михайло Малацко, о. Юлиян Рац, о. Янко Колошняї и новосадски дзияк Йовґен Надь, бешедовали сами шпиваче, крем о. Колошняя, котри жиє у Канади, як и модератор соботовей програми Микола Шанта.
Спомнути з тей нагоди бешедовали о тим як ше после длугшого часу знова позберали и одлучели реализовац тот музични ЦД, хтори видал Дом култури, а финансовали Парохия св. о. Миколая у Руским Керестуре и о. Янко Колошняї. Тиж так, визначели же им у пририхтованю и знїманю ЦД-у вельо помогли Юлиян Рамач Чамо и Мирон Сивч, котри их провадзели на гармоники, а Сивч за тот квартет прилагодзел и аранжмани даскелїх шпиванкох.
Числени нащивителє мали нагоду чуц и знїмки шпиванкох з ЦД-у, а з гласним аплаузом одреаґовали кед шпиваче наявели же планую зняц и музични ЦД з колядами.
О кнїжки поезиї младей авторки Асї Папуґовей з Керестура бешедовали єй рецензенти Ваня Дула и Олена Планчак Сакач, котра визначела же видаванє Асйовей кнїжки вшелїяк нє була гришка, гоч збирка так насловена. Ася, котрей то друга обявена кнїжка поезиї, тиж бешедовала о своїх творох и пречитала єдну писню.
Планчак Сакач бешедовала и о збирки поезиї Миколи Шанту з Коцура „Вселенска черкотка”, чий наслов, як гварела, метафорични и нагадує якиш черчаци глас з вселени, яки чує лєм поета и през стихи го жада сообщиц ширшому авдиториюму. Визначела же то и наш руски глас, специфични, кодировани, ориґинални и з хторим поета жада зохабиц свой шлїд у вселени.
Шанта и сам пречитал даскельо твори з тей його седмей кнїжки, а на концу и стихи з кнїжки Владимира Бесерминя „Слово Бояна двокраяна” хтору, як гварел Шанта, Бесерминї писал у остатнїх мешацох свойого живота.
На соботовей програми „Костельниковей єшенї” госц бул Мишани хор Дому култури и Катедралней церкви з Керестура, хтори виведол три духовни и народни шпиванки.
