РУСКИ КЕРЕСТУР – Дзень просвитних роботнїкох Сербиї, 8. новембер, просвитни роботнїки зоз шицких местпх кулскей општини означели зоз заєднїцким друженьом у рускокерестурским Ресторану „Червена ружа”, а у орґанизациї синдикату домашнєй Школи „Петро Кузмяк”.
Як Рутенпрес дознава од директорки Школи Хелени Пашо Павлович, внєдзелю, 8. новембра Керестурци були домашнї 160 просвитним роботнїком зоз шицких основних и штреднїх школох у кулскей општини, як и Школи за основне музичне образованє и Предшколскей установи „Бамби”.
Дзень просвитних роботнїкох зоз своїм присуством на тим заєднїцким вечаре возвеличали и чолнїки локалней самоуправи – предсидатель Општини Кула Драґан Трифунович, його заменїк Велибор Милоїчич, предсидателька Скупштини општини Снежана Мркаич, началнїк Општинскей управи Владимир Павков, руководителька Оддзелєна за дружтвени дїялносци Општинскей управи Драґана Потпара и директор кулского ЯКП „Комуналєц” Дамян Милянич.
Друженє прешло з музику, а домашнї ше остарали и за рижнородни и богати томболи, хтори спонзоровали привреднїки, подприємства и установи з Керестура и других местох општини.
Вечар просвитних роботнїкох ше кажди рок орґанизує у другим месце, та так заставку просвитних роботнїкох Општини Кула директорка керестурскей Школи Хелена Пашо Павловичова внєдзелю придала ОШ „Велько Влахович” у Крущичу, хтора на рок будзе домашня означованю Дня просвитних роботнїкох Сербиї у кулскей општини.
