РУСКИ КЕРЕСТУР – Главна програма 18. Мултимедиялней манифестациї младих „Дньовка” отримана всоботу, 21. новембра, у орґанизациї младих з „Pact Ruthenorum”. З програму младих закончена и тогорочна Двацец друга Културна манифестация „Костельникова єшень”, хтора у вецей наших местох тирвала од 6. по 21. новембер.
На „Дньовки” ше з музику, танцом, поезию и видеом представели млади з Руского Керестура, Коцура и Зомбора, а програма отримана у Велькей сали Дому култури, хтора була полна з нащивителями.
Того року було менєй учашнїкох як скорей, а млади найвецей наступали з музику. Себастиян Надь одшпивал шпиванку на анґлийским язику, а на ґитари го провадзела Марина Роман, хтора мала и соло наступи, дзе шпивала и грала на ґитари. Тиж так, Марина шпивала и у дуету з Кристину Афич, а Кристина и сама виведла єдну анґлийску композицию. На концу наступел Мирослав Малацко, котрого на ґитари тиж провадзела Марина, а потим одшпивали и дует. Шицки спомнути з Руского Керестура.
Иґор Горняк Пишта з Коцура одреповал єдну писню по руски з його нєдавно обявеного албуму, а керестурска ґрупа „Crazy cousins” виведла два композициї и трецу започала но, як на програми гварели члени ґрупи – виведу ю нарок, док ю лєпше увежбаю.
Тогорочна главна програма „Дньовки” почала з танєчним наступом Николини Шарич з Керестура, котра одтанцовала модерни танєц споза плахти, та єй силуету и рухи було видно лєм як цинь, док Саша Сабадош зоз Зомбора участвовал зоз свою поезию, цо того року була и єдина литературна точка програми.
Емитовани и видео Двох Саньох, на хторим млади прекоментаровали їх роботу и повинчовали им ювилей емисиї „Останьце нашмеяни”. Два Санї на видеу поволали младих же би ше приявели на авдицию за водительох тей младежскей радио-емисиї и здогадли публику же до конца рока тирва конкурс їх емисиї за вибор „Най Руснака/Рускинї 2015”.
Шицки учашнїки доставали моцни аплаузи, а окреме наймладши, котри мали найвекшу потримовку своїх парнякох у публики.
Як и прешлого року, и на тогорочней „Дньовки” нє було класичних водительох, алє кратка биоґрафия учашнїкох представяна на видео-биму.
После програми, млади друженє предлужели у Дискотеки „Амадеус”, дзе музику пущали „Nation Deejays”.
Отримованє дводньовей Мултимедиялней манифестациї младих „Дньовка” финансийно помогли Завод за културу войводянских Руснацох, Национални совит Руснацох и Месна заєднїца Руски Керестур, а орґанизована є з потримовку Дому култури Руски Керестур, РНТ „Петро Ризнич Дядя” и НВУ „Руске слово”.
