Емануел Жилник, IV, Коцур

МОЙ НАЙЛЄПШИ ПАЙТАШ

            Мой найлєпши пайташ Никола. Жиє у Новим Садзе. Ма дзешец роки, очи му кафово, власи бляди кафово. Досц є високи за свой возрост. Тренира фодбал, а люби бавиц и кошарку.  

Познали зме ше и у яшелькох, алє зме у оводи нє були у истей ґрупи. Кед зме почали ходзиц до школи, случело ше же зме праве у истей класи. Кед ше зме видзели, презпознали зме ше, бешедовали зме на каждим одпочивку, док ми раз нє гварел же и жиє блїзко при мнє. Догварели зме ше же и док будземе старши, вше ше будземе дружиц и бавиц ше. На концу так и було, та ше и тераз дружиме. Любиме ше бавиц єден з другим, часто ходзиме до себе. Алє нє вше ше бавиме лєм ми двоме, углавним зме и з другима.

Так я нашол найлєпшого пайташа и прето сом щешлїви.

Иван Будински, V, Нови Сад

ЦО ЗМЕ ВИДЗЕЛИ И ПОЧУВСТВОВАЛИ У ПРИРОДИ

            Були зме у парку. Було цепло. У парку було древо ґестинї, лампащики, орґони, трава, бреза…

            Трава барз фино пахла, бо була скошена. Чули зме птички як шпиваю, видзели зме и бетелїну, любичици, врани, голуби, тащки… У природи сом ше чувствовала щешлїво, прето же любим буц на швижим воздуху кед цепло.

            Були зме ше прешейтац, бо була барз красна хвиля.

Лара Салак, III, Дюрдьов

КЕД БИМ БУЛ НАСТАВНЇК

            Кажде голєм раз задумовал як би то було кед би стал опрез табли и учел дзеци. Тота робота красна, алє є анї кус нє лєгка.

            Кажди наставнїк ма даяки иншаки характеристики. Кед бим бул наставнїк, бул бим добри, любезни и праведни. Нє бул бим строги, алє шор би ше мушело знац. Наставнїка ше муши почитовац. Хасновал бим интересантни приклади зоз природи же би лєгчейше научели лекцию. Оценьовал бим намаганє дзецох. Од школярох бим глєдал же би хасновали свою главу, а нє же би лекцию учели напамят. Любел бим кед би ми ше школяре питали цо им нє ясне, же би сом им потолковал, без страху же достаню подлу оцену. На моїх годзинох би була приємна атмосфера, було би барз интересантно и вельо того би ше научело.

            Кед бим насправди бул наставнїк, любел бим же би школяре до моєй учальнї приходзели з дзеку, а виходзели зоз вельким ошмихом на твари.

Тони Сивч, V, Руски Керестур

ЗРОБЕЛ СОМ ДАЦО ХАСНОВИТЕ

            Єдного красного рана, кед сом станул, у нас була баба. Пришла нас обисц, бо мац була на роботи. Баба ше ми питала чи сом купел даяки дарунок мацери за Осми марец.

            Верим же моя мац люби кед достанє шольку, квеце, або даяку кнїжку як дарунок, алє я нє мал динари, та сом роздумовал цо можем подаровац мацери, а най єй значи. Роздумовал сом и здумал же можем зробиц цошка цо вона роби кажди дзень. Здумал сом поробиц цошка хасновите, а то же бим попораєл цале обисце. Тота идея ми спадла на розум прето же кед би я попораєл, вона би вистата после роботи могла лєгнуц и одпочинуц ше. И так сом почал пораїц. Баба ми сцела помогнуц же бим швидше покончел тото цо мам. Прето же Осми марец, уварел сом єй чай и пущел серию най ше дакус и вона одпочинє. Пошвидко сом ше врацел ґу роботи же бим ю покончел цо швидше. Робел сом шицко чого сом ше здогаднул: посцерал прах на полїчкох, почухал облаки, попосцелял, усисал хижу и таки даяки роботи хтори вона роби каждодньово. Поробел сом шицко цо сом думал, а понеже остало ище вельо часу, конєчно сом шеднул дакус ше одпочинуц. Баба ми гварела же бим могол покошиц траву у дворе. Кед сом чул тоти слова, нє було ми добре, алє мушел сом. Конєчно сом зоз шицким закончел, алє сом подумал же сом лєм дакус поробел, та сом мушел ище даяки дробнїци направиц. Уварел сом єй кафу и пущел филм на телевизиї.

            Кед ше мац врацела, була барз щешлїва и подзековна. Гоч сом нє мал динари купиц єй дарунок, зробел сом цошка хасновите и обрадовал ю.

Марко Станкович, VII, Дюрдьов

ПРИНЦ КАРЛ И ПРИНЦЕЗА ГВИЗДА

Принц Карл нашол скриту кнїжку у старим орманє. У кнїжки пречитал же принцеза по мену Гвизда зарабрована у дворцу.

Ту пренашол и ключ од дворца. А у кнїжки пречитал же муши ошлєбодзиц принцезу до осем годзин вечар. Ошедлал вон свойого чарного коня по мену Ґавро и рушел до кральовства. Кед сцигол, видзел опрез капури двох стражарох. Удало ше принцови поспреведац стражарох и ушуняц ше до дворца. Знал же ше принцеза находзи у найвисшей часци дворца и такой ше почал пендрац по ґарадичох. Одомкнул дзвери, вжал принцезу Гвизду и вишуняли ше през тайни дзвери. Шедли на коня и пошли до принца.

Там були щешлїви до конца живота.

Предшколска ґрупа Пчолки, Руски Керестур

ЦИФРОВАНИ ПТИЦИ НА ДРЕВЕ

            Єдного ярнього дня сом вишла вонка и на конарох збачела цифровани птици. Даєдни були червени, белави, даєдни целови, цифровани… Весело шпивали, прелєтовали зоз конара на конар, а я шедзела на лавочки и слухала. Жовта птица найгласнєйше шпивала, а лилова зоз белавим мирно шедзела. Целова зоз шерцочками ми пришла пошептац же будзем шпивац на „Пупчу” и гварела же ме придзе патриц.

            Шицки птички були щешлїви, а и я зоз нїма.

Лейла Штранґар, III, Руски Керестур

ОСОБА КОТРУ ЛЮБИМ

Особа котру любим то мой брат. Вон ше вола Борис. 

Борис ма 23 роки. Вон дома окончує велї роботи. Я му помагам коло тих роботох. Купел ми штири кощата и єдно целє. Научел ме кармиц статок, як и гонїц трактор. Учел ме робиц на полю. Посадзели зме паприґу и цибулю. Вон хова вельки буяци. Направели зме хлїв. Ховаме и швинї, и кури. Барз му любим помагац.

Барз любим свойого брата и помагац му коло роботох. 

Давид Тимко, IV, Коцур

МОЙ ОЦЕЦ

Мам вельо особи котри ми барз знача, алє вам опишем лєм єдну. Опишем вам мойого оца.

Мой оцец ше вола Мирослав. Вон ма 37 роки. Занїма ше зоз землєдїлством и статкарством. Я му помагам кармиц буяци и швинї. На полю му помагам гонїц трактор кед треба. Мой оцец добри. Ма желєни очи и красни ошмих. Найвецей часу препровадзуєме вєдно на швето, або внєдзелю. Водзи ме на польо, на сладоляд, лапац риби, до предавальнї, до парку. Вжиме бавиме дружтвени бависка, шах… Купує ми цо пожадам, алє нє вельо.

Любим свойого оца прето же є добри и мили. Жадам же би бул живи и здрави и же би жил сто роки.

Алексей Уйфалуши, IV, Коцур

ЗРОБЕЛ СОМ ДАЦО ХАСНОВИТЕ

            Кед ше жиє на валалє, вельо хасновити дїла мож зробиц, алє за тото треба мац дзеки.

            Пришла яр, та ше и роботи на валалє звекшали. Оцец ми гварел най пойдзем з нїм дерляц. Лєм цо зме почали робиц, дїдо пришол на моторки и гварел татови най пойдзе дому витовариц єдзенє за швинї. Гоч ми гварел най нїч нє рушам док ше нє враци, а знал же ше затрима, я почал сам робиц. Закончел сом польо и мал сом поробиц ище два поля блїзко. И то сом закончел. Рушел сом на дильов и стретнул оца. Перше бул нагнївани, алє вец ми подзековал же сом му помогнул. Нє мал сом мира, та сом потим и шицке єдзенє за швинї унєсол до шопи. Мац пришла нашеяна и гварела най єй помогнєм, же бим ище баржей нєсподзивал оца. Вона закончела з роботу и пошла оберац габзу, а я направел вечеру. Кед пришол з поля, оцец бул нєсподзивани же шицка робота покончена и же може скорей лєгнуц спац. Родичи ше вєдно догварели же достанєм дарунок од нїх.

            Гоч сом бул щешлїви пре дарунок, похопел сом же важнєйше буц вредни и поробиц дацо хасновите, бо ше робота и послухносц вше виплаца.   

Владимир Молнар, VII, Дюрдьов