РУСКИ КЕРЕСТУР – На схадзки Совиту Месней заєднїци Руски Керестур отриманей вчера, 17. октобра, бешедоване и о розподзельованю средствох хтори у општинским буджету остали зоз прешлого року законченого керестурского самодоприносу.
По одлукох Општини Кула и законченей явней набавки, тих дньох, а найвироятнєйше на пияток, почнє асфалтованє улїцох на Новим населєню, понеже су у таким стану же их нє вредзи платац.
Єдна з векших инвестицийох хтора будзе финансована зоз самодоприносу и фабрика води, за хтору заплановане видвоїц 6 милиони 800 000 динари. За тераз то ище у фази проєкту, а фабрику води ше будзе финансовац и будовац вєдно з Крущичом.
Як предложене, за пенєж цо останє – милион 350 000 динари – Совит МЗ од Општини Кула будзе вимагац же би пропорцийно бул розподзелєни як дотациї керестурским здруженьом у 2018. року. Кед же Општина нє прилапи таке предкладанє, Совит МЗ будзе одлучовац о способе трошеня тих средствох.
Предсидатель Совиту МЗ Владимир Олеяр членох поинформовал же того року найвироятнєйше нє буду платани дзири на калдермох по валалє, та анї у цалей општини, понеже понїщена општинска явна набавка, та ше розписованє новей за тоту роботу обчекує на яр.